Pro 14: Dreigiau 25-18 Gweilch

Leon Brown a sgoriodd y cais cyntaf i'r Dreigiau

Roedd yna siom bellach i'r Gweilch oddi cartref yn erbyn y Dreigiau ddydd Sadwrn wedi iddynt gael eu trechu o saith pwynt.

Ceisiau hwyr gan seren y gêm Rio Dyer a'r eilydd Adam Warren a seliodd y fuddugoliaeth wedi cais cynnar gan brop Cymru Leon Brown.

Fe wnaeth cyn-chwaraewr y Gweilch Sam Davies ychwanegu deg pwynt at y sgôr.

George North yn sgorio ar ei ymddangosiad cyntaf wedi Cwpan Rygbi'r Byd

George North a Tiaan Thomas-Wheeler sgoriodd i'r Gweilch ond bu'n rhaid i North adael y cae oherwydd anaf - newyddion drwg i hyfforddwr Cymru Wayne Pivac a chapten y Gweilch Justin Tipuric.

Ddydd Sadwrn oedd y tro cyntaf i North chwarae wedi gêm gyn-derfynol Cwpan Rygbi'r Byd yn Japan.

Roedd y Gweilch ar y blaen o bum pwynt (18-13) wrth i'r gêm dynnu tua ei therfyn ond mae'r ffaith i'r Dreigiau frwydro'n ôl yn adlewyrchu tynged y Gweilch y tymor hwn - maent bellach wedi colli 11 gêm yn olynol ac 13 allan o 14.