33 mlynedd dan glo i ddau ddyn am fewnforio cocên

Cafodd Scott Kilgour (chwith) a Gary Swift (dde) eu harestio ar y cwch tua milltir oddi ar arfordir Abergwaun

Mae dau ddyn wedi'u carcharu am gyfanswm o 33 mlynedd ar ôl cael eu dal gyda 751 cilogram o gocên gwerth £60m ar fwrdd cwch oedd wedi hwylio ar draws Fôr yr Iwerydd.

Fe deithiodd Gary Swift, 53, a Scott Kilgour, 41, i Suriname yn Ne America i gasglu'r cyffuriau ym Mehefin y llynedd.

Mewn cyrch oedd wedi'i threfnu, fe gafodd y cwch llawn cyffuriau ei stopio ger Abergwaun, Sir Benfro ym mis Awst 2019.

Daeth yr Asiantaeth Droseddau Cenedlaethol (NCA) o hyd i 751 cilogram o'r cyffur - gwerth hyd at £60m ar y stryd - ar gwch hwylio'r SY Atrevido ym Mae Sain Ffraid.

Cafodd Swift a Kilgour, y ddau o Lerpwl, eu harestio ar fwrdd y cwch.

• Dau'n cyfaddef mewnforio 750kg o gocên

• 750 cilogram o gocên ar gwch hwylio

Yn Llys y Goron Abertawe ddydd Llun, cafodd Swift ddedfryd o 19 mlynedd a hanner o garchar, ac fe gafodd Kilgour 13 mlynedd a hanner o garchar.

Roedd y ddau wedi pledio'n euog i gyhuddiad o fewnforio cocên.

Roedd y cocên â phurdeb hyd at 83%, yn ôl yr NCA

Clywodd Llys y Goron Abertawe fod Swift wedi dweud wrth swyddogion ar ôl cael ei arestio: "Fi ydy'r un drwg yn fan hyn. Roedd yn rhaid i mi gyfaddef. Dwi'n falch ei fod drosodd."

Cafodd 751 o becynnau cocên eu canfod ar y cwch - wedi'u storio ym mhob man, gan gynnwys yr oergell.

Dywedodd y bargyfreithiwr Anthony Barraclough ar ran yr amddiffyn fod Swift wedi cael ei berswadio i fewnforio'r cyffuriau gan gwsmer mewn gwesty yr oedd yn berchen arno.

Ychwanegodd Mr Barraclough fod Swift wedi cael ei ddyfarnu'n fethdalwr.

Cafodd y cwch llawn cyffuriau ei stopio ger Abergwaun ym mis Awst 2019

Clywodd y llys mai Kilgour brynodd y cwch yn Majorca yn Rhagfyr 2018.

Bydd Swift a Kilgour yn treulio o leiaf hanner eu dedfryd dan glo cyn cael eu rhyddhau ar drwydded.