Reading yn gwrthod cais am ymddiheuriad Caerdydd

Bydd Caerdydd a Reading yn cwrdd eto yn y Bencampwriaeth nos Wener yn Stadiwm Dinas Caerdydd

Mae Clwb Pêl-droed Reading wedi addo adolygu eu gweithdrefnau ar ddyddiau gemau, ond yn cefnogi penderfyniad i gosbi cefnogwyr Caerdydd am "sylwadau hiliol".

Cafwyd canlyniad cyfartal rhwng y ddau dîm yn eu gornest yng Nghwpan FA Lloegr ddydd Sadwrn.

Wedi hynny daeth i'r amlwg fod Heddlu Thames Valley yn ymchwilio i honiadau bod rhai o gefnogwyr Caerdydd wedi gweiddi sloganau hiliol yn ystod y gêm, ac fe gafodd pedwar o bobl eu harestio.

Roedd clwb Caerdydd yn cwestiynu'r honiadau cyn mynnu ymddiheuriad gan glwb Reading.

• Hiliaeth: Caerdydd yn mynnu ymddiheuriad

• Arestio pedwar o gefnogwyr Caerdydd

• Reading 1-1 Caerdydd

Mewn datganiad ddydd Mawrth fe wnaeth Reading gefnogi'r penderfyniad yn ymwneud â "dau achos ynysig o sarhau hiliol".

Meddai'r datganiad: "O ganlyniad i ddatganiadau gafodd eu gwneud i'r heddlu y prynhawn hwnnw, penderfynwyd fod digon o dystiolaeth i arestio pedwar o gefnogwyr Caerdydd am sylwadau hiliol honedig... er mwyn cyfiawnhau arestio mae angen sail rhesymol.

"Mae Heddlu Thames Valley yn parhau i ymchwilio ac fe fyddwn yn parhau i gynorthwyo'r awdurdodau gyda'r ymchwiliadau."

Mae'r heddlu'n ymchwilio i'r achos honedig yn Stadiwm Madjeski

Brynhawn Llun gofynnodd Caerdydd am ymddiheuriad gan honni fod eu cefnogwyr wedi cael eu labelu fel hiliol.

Dywedodd datganiad clwb Caerdydd: "Roedd modd clywed yr iaith yma yn dod o gefnogwyr y ddau glwb, ac o natur gwrth-Gymreig a gwrth-Saesnig.

"Rydyn ni'n siomedig iawn bod Clwb Pêl-droed Reading wedi dewis labelu'r ymddygiad yma fel un hiliol a homoffobig (ble does dim tystiolaeth wedi bod).

"Rydyn ni hefyd yn cwestiynu'r camau a gymeron nhw ar y dydd, ac yn croesawu ymchwiliad i'r mater er budd y ddau glwb ac i bêl-droed ym Mhrydain."

Mae Reading wedi addo adolygu'r penderfyniad i wneud datganiad cyhoeddus yn ystod y gêm ac wedi ymddiheuro i'r mwyafrif o gefnogwyr Caerdydd oedd yn y gêm "oedd ddim yn rhan o'r sarhau hiliol ac oedd yn teimlo eu bod wedi eu pardduo gan y cyhoeddiad" yn Stadiwm Madejski.

Mae Cymdeithas Bêl-droed Lloegr yn ymchwilio i'r mater ac wedi gofyn i'r ddau glwb am eu sylwadau.

Bydd y ddau glwb yn cwrdd eto yn y Bencampwriaeth yn Stadiwm Dinas Caerdydd nos Wener, ac eto yn ailchwarae'r gêm yng Nghwpan FA Lloegr y nos Fawrth ganlynol, 4 Chwefror.