Chwe Gwlad 2020: Cymru 42-0 Yr Eidal

Josh AdamsStu Forster

Josh Adams yn sgorio'r cyntaf o'i dri chais

Fe ddechreuodd ymgyrch Cymru yn y Chwe Gwlad eleni gyda buddugoliaeth ysgubol o 42-0 yn erbyn Yr Eidal yn Stadiwm Principality ddydd Sadwrn.

Ond bu'n rhaid i Gymru ddisgwyl tan y munudau olaf i sicrhau'r pwynt bonws, gyda George North yn croesi am gais rhif pedwar.

Fe sicrhaodd Josh Adams ei hat-tric gyda symudiad olaf y gêm, wrth i dîm Wayne Pivac atal yr Eidalwyr rhag sgorio'r un pwynt.

Aeth y tîm cartref ar y blaen yn gynnar yn y gêm, gyda Dan Biggar - yn hytrach na Leigh Halfpenny - yn cicio tair cic gosb, gan gynnwys un o bellter.

Yn fuan wedyn, fe wnaeth Adams ymestyn y fantais, ar ôl iddo orffen symudiad da gan yr olwyr a chroesi yn y gornel chwith.

Fe groesodd Adams yn yr un gornel eto ar ôl cyfnod hir o bwyso a phas rhwng ei goesau gan Biggar.

Ian Cook - CameraSport

Fe lwyddodd Nick Tompkins, 24, i greu dipyn o argraff yn ei ymddangosiad rhyngwladol cyntaf

Nid yw’r post yma ar Twitter yn gallu ymddangos yn y porwr. Os gwelwch yn dda defnyddiwch Javascript neu geisio eto ar borwr gwahanol.Gweld y cynnwys gwreiddiol ar Twitter.
Nid yw'r BBC yn gyfrifol am gynnwys safleoedd allanol
I osgoi neges twitter gan Clwb Rygbi

Caniatáu cynnwys Twitter?

Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen polisi cwcis Twitter a pholisi preifatrwydd cyn derbyn. Er mwyn gweld y cynnwys dewiswch ‘derbyn a pharhau’.

Nid yw'r BBC yn gyfrifol am gynnwys safleoedd allanol

Roedd yr ail hanner yn arafach o ran tempo, gyda'r Eidal yn hawlio mwy o feddiant.

Ond fe sbardunwyd y gêm gyda chais gan un o'r wynebau newydd yn y garfan.

Nick Tompkins - a oedd wedi creu argraff pan ddaeth ymlaen am gyfnod byr yn yr hanner cyntaf - sgoriodd y cais wedi bylchiad ffrwydrol cyn tirio o dan y pyst.

Fe allai'r sgôr fod wedi bod yn fwy o destun embaras i'r Eidalwyr, ar ôl i gais George North gael ei ganslo gan y dyfarnwr fideo.

Cafodd North ei lusgo dros y llinell gais gan y bytholwyrdd Alun Wyn Jones, cyn i Adams gwblhau'r grasfa ar ôl i'r cloc droi'n goch.

Ond roedd hi'n berfformiad calonogol iawn i Pivac a'i dîm hyfforddi newydd, wrth i'r paratoadau droi at y daith i Ddulyn ddydd Sadwrn nesaf.

Seren y gêm - Justin Tipuric

Tîm Cymru

Leigh Halfpenny; Johnny McNicholl, George North, Hadleigh Parkes, Josh Adams; Dan Biggar, Tomos Williams; Wyn Jones, Ken Owens, Dillon Lewis, Jake Ball, Alun Wyn Jones (capt), Aaron Wainwright, Justin Tipuric, Taulupe Faletau.

Eilyddion: Ryan Elias, Rob Evans, Leon Brown, Cory Hill, Ross Moriarty, Rhys Webb, Jarrod Evans, Nick Tompkins.

Tîm Yr Eidal

Matteo Minozzi; Leonardo Sarto, Luca Morisi, Carlo Canna, Mattia Bellini; Tommaso Allan, Callum Braley; Andrea Lovotti, Luca Bigi (capt), Giosuè Zilocchi, Alessandro Zanni, Niccolò Cannone, Jake Polledri, Sebastian Negri, Abraham Steyn.

Eilyddion: Federico Zani, Danilo Fischetti, Marco Riccioni, Dean Budd, Marco Lazzaroni, Giovanni Licata, Guglielmo Palazzani, Jayden Hayward.

Straeon perthnasol