Eglwysi trefi glan môr yn agor eu drysau i'r digartref

Fel rhan o'r cynllun bydd eglwysi yn cynnig llety a brecwast i 10 o bobl ddigartref ar y tro

Mae nifer cynyddol o bobl ddigartref mewn trefi glan môr gogledd Cymru yn cael eu helpu trwy gynllun newydd.

Bydd pum eglwys yn Llandudno a Bae Colwyn yn agor eu drysau un noson yr wythnos, gan roi llety a brecwast i 10 o bobl ar y tro.

Tra bod digartrefedd yn aml yn broblem sy'n cael ei chysylltu â dinasoedd, mae gwirfoddolwyr yn credu bod cynnydd wedi bod mewn trefi arfordirol hefyd.

Mae 150 o bobl wedi derbyn hyfforddiant i helpu yn ystod y cynllun chwe wythnos.

Bydd pobl sy'n cysgu ar y stryd, sydd wedi'u cyfeirio at y cynllun gan Gyngor Conwy, yn cael eu cludo i'r eglwysi mewn bws mini o wahanol ardaloedd.

Mae Bae Colwyn wedi gweld cynnydd mewn digartrefedd, ond mae diffyg cyfleusterau i'w helpu

"Tra bod cefnogaeth i'r rheiny sy'n ddigartref yn cael ei anelu ar ddinasoedd a threfi mawr, mae trefi glan môr fel Llandudno a Bae Colwyn yn gweld cynnydd yn nifer y bobl sy'n cysgu ar y stryd," meddai'r Parchedig Mike Harrison.

"Mae 'na gefnogaeth i bobl ddigartref yn ystod y dydd, ond does dim cyfleusterau addas iddyn nhw gyda'r nos."

Mae'r ffigyrau diweddaraf yn amcangyfrif bod 405 o bobl yng Nghymru yn cysgu ar y stryd.

Tra bo'r niferoedd mwyaf mewn siroedd dinesig fel Caerdydd (92), roedd nifer sylweddol hefyd mewn ardaloedd ar hyd arfordir y gogledd, fel Conwy (21) a Gwynedd (22).