'Perygl i swyddi Cymru' o ruthro trafodaethau Brexit

Mae Prif Weinidog Cymru wedi rhybuddio fod Llywodraeth y DU yn peryglu swyddi yng Nghymru wrth "ruthro" i geisio cael cytundeb masnach gyda'r UE.

Mae gweinidogion y DU wedi dweud y byddan nhw'n penderfynu ym mis Mehefin a fyddan nhw'n rhoi'r gorau i drafodaethau a dechrau paratoi ar gyfer Brexit heb gytundeb.

Bydd hynny, medden nhw, yn dibynnu ar faint o gynnydd sydd wedi'i wneud yn y trafodaethau hynny.

Ond dywedodd Prif Weinidog Cymru Mark Drakeford y gallai tariffiau gael effaith fawr ar ffermwyr a'r sector bwyd os nad oes cytundeb.

Eisiau trafodaethau sydyn

Mae prif weinidog y DU, Boris Johnson wedi dweud ei fod eisiau cytundeb gyda'r Undeb Ewropeaidd erbyn 31 Rhagfyr 2020, gan fynnu na fydd yn ymestyn y terfyn amser hwnnw.

Cyn i'r trafodaethau ddechrau ddydd Llun mae Llywodraeth y DU wedi cyhoeddi dogfen yn amlinellu eu blaenoriaethau.

Mae hynny'n cynnwys dymuniad am gytundeb fasnach gyda'r UE sy'n seiliedig ar y rhai rhwng yr UE a Canada, Japan a De Corea, ble fyddai dim awdurdod gan Lys Cyfiawnder Ewrop dros y DU.

Y bwriad yw amlinellu cytundeb bras erbyn mis Mehefin, er mwyn gallu ei "gwblhau'n sydyn" erbyn mis Medi.

Mae Boris Johnson wedi addo cytundeb masnach gyda'r UE erbyn diwedd y flwyddyn

Ond fe rybuddiodd Mr Drakeford y byddai rhuthro i gytundeb "sylfaenol" gyda'r UE yn gwneud niwed i Gymru yn y pen draw.

"Maen nhw'n rhuthro i gael cytundeb - unrhyw gytundeb - erbyn diwedd y flwyddyn," meddai.

"Mae'r uchelgais gwleidyddol yna yn amlwg yn bwysicach iddyn nhw na chael cytundeb sydd o fudd i bob gwlad yn y DU.

"Mae'r cynigion yn rhoi ideoleg o flaen bywoliaeth pobl."

'Gwarchod sofraniaeth'

Dywedodd gweinidog cabinet Llywodraeth y DU, Michael Gove ei fod eisiau sicrhau "cytundeb masnach rydd gynhwysfawr" o fewn naw mis.

Ond mynnodd na fyddai'r DU yn derbyn gorfod dilyn deddfau'r UE, gan ddweud na fyddai'n aberthu "sofraniaeth" yn y trafodaethau.

Mewn datganiad dywedodd llefarydd ar ran Llywodraeth y DU y byddan nhw'n "gweithio gyda'r gweinyddiaethau datganoledig" i sicrhau perthynas yn y dyfodol oedd yn "gweithio ar gyfer y DU gyfan".

"Mae'r agwedd tuag at drafodaethau rydym wedi cyhoeddi heddiw yn weledigaeth o berthynas sy'n seiliedig ar gydweithrediad cyfeillgar rhwng y DU a'r UE," meddai.

"Pleidleisiodd pobl Cymru dros adfer annibyniaeth economaidd a gwleidyddol y DU ac rydym yn cyflawni ar y bleidlais honno."