Capten Cymru'n galw am ymchwiliad i ymddygiad Marler

Mae Joe Marler ac Alun Wyn Jones wedio chwarae gyda'i gilydd i'r Llewod

Mae Alun Wyn Jones wedi dweud y dylai'r awdurdodau rygbi edrych ar ddigwyddiad yn ystod y gêm yn erbyn Lloegr ddoe - lle'r oedd hi'n ymddangos fod prop Lloegr wedi gafael yn ei organau rhyw.

Yn ôl capten Cymru doedd e ddim yn siŵr sut i ymateb i'r digwyddiad: "Mae'n ddiddorol a beth fydde chi yn gwneud yn y sefyllfa yna?

"Rydw i wedi ennill 138 gem brawf i fy ngwlad, ond os ydw i'n ymateb a chael cerdyn coch mae'n anodd.

"Gobeithio gwneith yr awdurdodau edrych ar y digwyddiad."

Yn ôl Jones fe wnaeth e ysgwyd llaw â Marler ar ddiwedd y gêm, ond wnaeth e ddim siarad â'r prop.

Yn ôl rheolau'r gêm: "Ni ddylai chwaraewr wneud unrhyw beth sydd yn groes i ysbryd da'r gêm gan gynnwys gafael, troi neu wasgu'r organau rhyw."

'Joe yn ddyn da'

Fe allai unrhyw drosedd gael cosb o waharddiad rhwng 12 a 208 wythnos.

Dywedodd Jones: "Mae Joe yn ddyn da ac mae lot o bethau yn digwydd ar gae rygbi.

"Fy nghwestiwn i yw bod e'n anodd iawn siarad â'r dyfarnwr ynglŷn ag unrhyw beth.

"Fe edryches i ar y llimanwr ond welodd e ddim byd, sy'n iawn."

Mewn ymateb i'r gêm, canlyniad siomedig i Gymru er gwaethaf ymdrech fawr yn yr ail hanner, dywedodd y prif hyfforddwr Wayne Pivac: "Byddwn yn adolygu'r gêm ac fe fyddwn ni'n galed ar ein hunain.

"Rydym yma i ennill gemau prawf. Dyw hynny heb ddigwydd yn yr wythhosau diwethaf, felly mae'n rhaid i ni ddysgu,

"Mae gennym gêm mewn saith niwrnod yn erbyn yr Alban ac mae'r bwysig ein bod yn parhau i wella."