Posib i'r Llyfrgell Genedlaethol fod yn ysbyty dros dro

Llyfrgell Genedlaethol Cymru

Mae swyddogion y bwrdd iechyd eisoes wedi ymweld â'r llyfrgell

Mae'r Llyfrgell Genedlaethol wedi cytuno i'r posibilrwydd o ddefnyddio'r adeilad fel ysbyty yn ystod yr argyfwng coronafeirws.

Mae swyddogion o Fwrdd Iechyd Hywel Dda wedi ymweld â'r llyfrgell yn Aberystwyth i drafod gwahanol opsiynau, gan gynnwys y posibilrwydd o droi rhan o'r adeilad yn ysbyty dros dro.

Mae defnyddio'r safle ar gyfer storio offer a chofnodion meddygol hefyd yn bosibilrwydd.

Dywedodd y prif weithredwr a llyfrgellydd, Pedr ap Llwyd: "Yn ystod amser o argyfwng cenedlaethol rydym ni'n falch iawn o fod mewn sefyllfa i gynnig cymorth ymarferol i Fwrdd Iechyd Hywel Dda trwy gynnig y defnydd o'n hadeilad."

Dangos cefnogaeth

Mae'r maes parcio eisoes yn cael ei ddefnyddio gan staff y gwasanaeth iechyd, ac mae'r llyfrgell yn annog ei staff i wneud gwaith gwirfoddol fel rhan o'r ymateb i'r pandemig.

Bydd y llyfrgell hefyd yn dangos ei chefnogaeth i'r GIG trwy oleuo'r adeilad yn las bob nos Iau.

Cafodd y llyfrgell ei chau i'r cyhoedd a staff yr wythnos cyn diwethaf i gyd-fynd â chanllawiau i leihau lledaeniad y feirws.

Ond mae mynediad i gasgliadau digidol y llyfrgell yn dal ar gael am ddim ar-lein, ac yn ôl swyddogion mae cynnydd wedi bod yn y nifer sy'n pori trwyddyn nhw wrth i bobl orfod aros yn eu cartrefi yn sgil yr argyfwng.

"Rydym yn hyderu y bydd defnydd o'r casgliadau hyn yn cael effaith bositif ar les a iechyd meddwl pobl yn ystod y cyfnod heriol hwn," meddai Pedr Ap Llwyd.

Mae'r adnoddau ar-lein yn cynnwys papurau newydd hanesyddol, llyfrau, mapiau, llawysgrifau, ffotograffau, archifau sain, fideo a ffilm.