Llanast lladron yng Nghapel Salem, Caernarfon

Mae aelodau Capel Salem yng Nghaernarfon yn apelio am wybodaeth wedi i ladron dorri mewn i'r adeilad a gadael llanast ar eu hôl.

Yn ôl y Parchedig Mererid Mair Williams, un o weinidogion y capel, mae'r lladron wedi dwyn offer system sain ac achosi difrod i styllau pren y llawr a drysau'r adeilad.

Fe ddisgrifiodd y Parch. Williams y difrod ar wefan Twitter: "Mae'r lladron wedi dwyn system sain y capel; meicroffonau, ceblau, desg gymysgu, a hanner cit drymiau.

"Maent wedi difrodi drysau a codi 'floorboards' mewn rhai llefydd."

Ychwanegodd bod swyddogion fforensig yr heddlu wedi bod i'r safle, a diolchodd am eu "cefnogaeth a'u sylw".

Ar adeg anodd eisoes, mae'r Parch. Williams yn cydnabod bod y lladrad wedi achosi digalondid pellach.

"Mae o'n rhwystredig. I gael hyn yn digwydd ar ben popeth arall. I be', 'de? Ond does dim pwynt rhesymu mae'n siwr."

Fel arfer, fe fyddai 60 o aelodau'n cwrdd yn y capel bob Sul, yn ogystal â gweithgareddau wythnosol, ond cafodd yr adeilad ei gau ym mis Mawrth oherwydd y cyfyngiadau cymdeithasol presennol.

Mae'r aelodau'n derbyn gwasanaeth wythnosol ar ebost ac mae'r ysgol Sul yn cyfarfod dros Zoom hefyd.

Roedd yr adeilad wedi cael ei ddiheintio a'i lanhau'n drylwyr yn barod i'w ail-agor wedi i'r argyfwng ddod i ben. Ond nawr, mae'n aneglur pryd fydd modd tacluso'r holl annibendod.

"Mae'n deimlad digalon. A'r peth mwyaf rhwystredig mae'n siwr ydy ar adeg normal, basai pawb wedi bod yno a phawb yn cael trefn.

"Ond, 'da ni'n mynd i adael y lle am bythefnos. Oherwydd ffordd mae pethau ar hyn o bryd, 'da ni ddim yn gwybod beth sydd wedi cael ei gyffwrdd.

"'Da ni ddim yn mynd i allu mynd yno tan bod y lle yn ddiogel. Dwi wir yn teimlo dros yr ofalwraig, achos roedd y lle y spotless cyn hyn."

Fe dynnodd y lladron hen luniau o'r diaconiaid a'r gweinidogion i lawr o'r waliau, a'u gosod yn daclus ar y llawr, a difrodi ystafelloedd y bobl ifanc yng nghefn y festri.

Mae'r heddlu a swyddogion fforensig wedi bod yno yn ymchwilio, ac arweinwyr y capel yn dweud eu bod yn ddiolchgar tu hwnt am eu hymateb, tra bod adnoddau'n brin yn sgil Covid-19.

"Rydym yn diolch i'r heddlu sy'n gweithio i geisio dal y lladron. Ond yn y cyfamser, os gwelodd rywun unrhyw beth amheus o amgylch Salem yn ddiweddar ac os clywch am rywrai yn ceisio gwerthu offer sain, plis cysylltwch."