Gwylwyr y Glannau: 'Cadwch yn glir o'r dŵr'

Criw bad achub RNLI Penarth, cyn i'r cyfyngiadau ddod i rym - maen nhw bellach wedi rhoi'r gorau i hyfforddi gwirfoddolwyr ar y dŵr

Mae un o orsafoedd bad achub prysuraf Cymru wedi gofyn i bobl gadw draw o'r dŵr i amddiffyn y gwasanaethau brys yn ystod y pandemig.

Mae criwiau bad achub Penarth wedi ymateb i dri digwyddiad tebyg yn yr un lleoliad ers dechrau'r cyfyngiadau, meddai'r rheolwr Jason Dunlop.

Dywedodd fod criwiau gwirfoddol wedi rhoi'r gorau i bob hyfforddiant wyneb yn wyneb er mwyn lleihau'r risg i'r criw.

"Yn amlwg y peth pwysicaf yw diogelwch ein criw," ychwanegodd Mr Dunlop.

Mae gwirfoddolwyr bellach yn defnyddio linc fideo fel modd o dderbyn hyfforddiant.

Esboniodd Mr Dunlop: "Rydyn ni wedi stopio popeth ar hyfforddi dŵr a gwneud cymaint ag y gallwn ni dros hyfforddiant digidol.

"Yn ffodus, mae'r RNLI yn hyfforddi llawer trwy weddill y flwyddyn felly mae ein criwiau'n barod i fynd.

"Mae gennym ni aelodau o'r gwasanaeth ambiwlans, mae gennym ni heddweision ac rydyn ni i gyd yn falch iawn ohonyn nhw ac rydyn ni'n gwneud ein gorau i'w cefnogi."

• CANLLAW: Beth ddyliwn i ei wneud?

• AMSERLEN: Effaith haint coronafeirws yng Nghymru

• IECHYD MEDDWL: Tips gan Dr Ioan Rees

• DYSGU: Sut i gadw'r plant yn brysur gartref

Mae'n llai prysur na'r arfer ar gyfer yr adeg o'r flwyddyn i'r criwiau o amgylch arfordir Cymru, ond nid yw pawb yn gwrando ar y pledion i aros gartref.

Yn ystod y tair wythnos gyntaf ar ôl cyhoeddi'r cyfyngiadau, cafodd badau achub RNLI eu galw i Ynys Sili dair gwaith i achub pobl oedd wedi'u dal gan y llanw, gan gynnwys grŵp o bedwar o bobl o Fryste.

"Mae angen i ni geisio annog pobl i ddilyn cyngor y llywodraeth i edrych ar ôl eu hunain, i atal galwadau i'r gwasanaethau brys fel y gallwn ofalu am y GIG ac achub bywydau hefyd," ychwanegodd Mr Dunlop.