Peilot wedi glanio heb ganiatâd 'i fynd i'r traeth'

runway

Dywedodd y peilot ei fod wedi dod o hyd i faes awyr Y Fali ar Google Earth

Fe wnaeth awyren breifat lanio ar faes awyr milwrol ar Ynys Môn heb ganiatâd am fod y peilot "eisiau mynd i'r traeth".

Fe laniodd y dyn ym maes awyr yr Awyrlu Brenhinol yn Y Fali ddydd Llun pan oedd y ganolfan ar gau ar gyfer gwaith cynnal a chadw.

Roedd wedi hedfan o faes awyr Fairoaks yn Surrey cyn glanio a mynd at rhan o'r Fali oedd yn agos ar yr arfordir.

Roedd criwiau tân a diogelwch Y Fali wedi credu'n wreiddiol ei fod wedi gorfod glanio oherwydd argyfwng.

Ond pan aethon nhw ato fe ddywedodd wrthyn nhw ei fod "wedi hedfan o Lundain er mwyn mynd i'r traeth".

'Y peilot wedi cael Covid-19'

Cafodd adroddiad ar y digwyddiad ei gyhoeddi yn Defence Aviation Safety Occurrence Report (DASOR), ac mae'n dweud: "Am 12:50 fe wnaeth yr awyren alw tŵr rheoli'r RAF yn Y Fali sawl gwaith cyn glanio ar lanfa 19 a pharcio ger y traeth.

"Dywedodd y peilot ei fod wedi hedfan o Lundain i fynd i'r traeth. Pan ddywedwyd wrtho fod y safle yn faes awyr milwrol a bod rheolau coronafeirws yn dal mewn grym yng Nghymru, atebodd fod 'hynny'n OK gan ei fod wedi ei gael o ddeufis yn ôl'.

"Dywedodd y peilot ei fod wedi dod o hyd i'r maes awyr ar Google Earth ac wedi nodi o Wikipedia fod maes awyr Ynys Môn ar agor i awyrennau sifil."

Cafodd y peilot ei archwilio ac fe gafodd wybod na fyddai'n medru gadael y maes awyr tan iddo ailagor y bore canlynol.

Ond dywedodd y peilot ei fod yn gadael beth bynnag, ac fe benderfynodd y staff i beidio rhwystro'r awyren rhag gadael.

Dywedodd llefarydd ar ran yr RAF: "Gallwn gadarnhau fod awyren sifil PC-12 wedi glanio ar lanfa gaeedig yn Y Fali heb ganiatâd ar 25 Mai.

"Er bod hyn yn afreolaidd, barnwyd nad oedd bygythiad i staff y ganolfan nac i'r cyhoedd. Mae'r digwyddiad wedi ei adrodd i'r Awdurdod Hedfan Sifil."

Straeon perthnasol