Teyrngedau i yrrwr fan 38 oed fu farw mewn gwrthdrawiad
- Cyhoeddwyd
Mae Heddlu Dyfed-Powys wedi cadarnhau enw dyn a fu farw mewn gwrthdrawiad ar yr A487 yng Ngheredigion ddydd Llun.
Roedd Benjamin Samuel Partis, oedd yn cael ei nabod fel Ben, yn 38 oed ac o ardal Aberteifi.
Bu farw wedi gwrthdrawiad rhwng fan a lori yn ardal croesffordd Pentregat, rhwng Tanygroes a Synod Inn.
Mae'r ymchwiliad heddlu i'r digwyddiad yn parhau.
Ben Partis gyda'i deulu
Dywedodd ei deulu mewn teyrnged: "Bydd y byd yn le tlotach hebddo.
"Roedd gan Ben gymeriad mawr a chalon fawr, llawn hwyl a chynhesrwydd. Roedd i blant, ei deulu a'i ffrindiau yn golygu popeth iddo, ac roedd yn dad a darpar ŵr ffantastig."
Ychwanegodd teyrnged y teulu fod Mr Partis "wastad y cyntaf i helpu, yn llawn brwdfrydedd ac egni".
"Roedd Ben yn meddwl yn ddiffuant am les eraill, wastad yn rhoi blaenoriaeth i hapusrwydd eraill o flaen ei hun."
Gan gydymdeimlo gyda'r teulu, dywedodd llefarydd ar ran yr heddlu eu bod yn awyddus i glywed gan unrhyw dystion i'r gwrthdrawiad sydd heb siarad â nhw eisoes.