Cymeradwyo cynllun £35m i adnewyddu Theatr Clwyd
- Cyhoeddwyd
![Argraff artist o Theatr Clwyd](https://ichef.bbci.co.uk/ace/standard/976/cpsprodpb/3294/production/_112884921_74b0ba7e-e99d-4130-a952-ce859688283e.jpg)
Argraff artist o fynediad y theatr ar ei newydd wedd
Mae cynlluniau i adnewyddu Theatr Clwyd ar gost o £35m wedi eu cymeradwyo.
Cafodd yr adeilad Rhestredig Gradd II ei adeiladu yn y 1970au yn Yr Wyddgrug, ond bellach mae'n dangos ei oed, gyda rhannau o'r to yn gollwng a mynediad gwael i'r anabl yn rhai o'r problemau sydd wedi eu nodi.
Dywedodd Cyngor Sir y Fflint, sydd yn berchen ar yr adeilad, y gallai'r problemau presennol effeithio ar gynnal sioeau a dramâu.
Fe fydd y gwaith adnewyddu'n golygu creu estyniad ar flaen yr adeilad, gyda chyntedd tri llawr a bwyty, bar a chaffi.
Dywed swyddogion y theatr nad oedd gwelliannau arwynebol bellach yn ddigon i sicrhau fod yr adeilad, gafodd ei agor yn 1976, yn cydymffurfio gyda rheolau iechyd a diogelwch modern.
![Theatr Clwyd](https://ichef.bbci.co.uk/ace/standard/976/cpsprodpb/11E8/production/_107848540_theatrclwyd_repton1x.jpg)
Agorodd y theatr yn 1976 ond bellach mae problemau wedi codi gyda'r adeilad
Dywed datganiad ar wefan y theatr: "Ers dros 40 mlynedd mae ein hadeilad wedi bod yn arloesi mewn rhagoriaeth ac yn gartref i'n cymuned ni.
"Ond mae'r adeilad angen ei ailddatblygu ar frys i sicrhau nid yn unig ei fod yn ddiogel ac yn addas i bwrpas ond hefyd i greu cartref gwyrdd ac ysbrydoledig i'n cymuned ni am y 40 mlynedd nesaf a thu hwnt.
"Bydd y prosiect unigryw yma yn sicrhau bod Gogledd Cymru'n cadw'r adnodd hanfodol a chynaliadwy yn ariannol yma ar gyfer cenedlaethau'r dyfodol."
![Theatr Clwyd](https://ichef.bbci.co.uk/ace/standard/976/cpsprodpb/59A4/production/_112884922_d2d7ba4c-32cc-4d45-8a08-a198b91458d3.jpg)
Bydd y fynedfa newydd yn cynnwys caffi, bar a bwyty
Mae disgwyl i Lywodraeth Cymru dalu am y mwyafrif o'r gost, ac mae'r awdurdod lleol a Cyngor y Celfyddydau wedi gwario £1 yn datblygu'r cynllun.
O achos y pandemig coronafeirws mae'r theatr ei hun wedi bod ar gau ers mis Mawrth, gyda yn yn achos colli £1m mewn trosiant meddai swyddogion.
Straeon perthnasol
- Cyhoeddwyd12 Mehefin 2020
- Cyhoeddwyd5 Mehefin 2020