Siopau Cymru 'i gael ailagor' ddydd Llun

Stryd Fawr Bangor yn dawel ddiwedd Mai ar ddiwrnod arferol y farchnad brysur wythnosol

Mae disgwyl y bydd siopau yng Nghymru yn cael clywed y byddan nhw'n cael ailagor ddydd Llun, pan fydd Prif Weinidog Cymru yn cyhoeddi casgliadau ei adolygiad diweddaraf o'r cyfyngiadau presennol ddydd Gwener.

Hyd yn hyn ers dechrau'r cyfnod clo dim ond siopau sy'n gwerthu nwyddau hanfodol, fel bwyd, sydd wedi bod ar agor yng Nghymru.

Ond mae disgwyl i Lywodraeth Cymru barhau i bwysleisio'r angen am ofal ac mai'r flaenoriaeth o hyd fydd "cadw Cymru'n ddiogel".

Mae siopau yn Lloegr wedi ailagor ers dydd Llun.

Dair wythnos yn ôl, yn ystod arolwg diwethaf Llywodraeth Cymru o'r canllawiau, roedd Mark Drakeford wedi dweud wrth gwmnïau i baratoi ar gyfer bod yn barod pan ddaw'r cyfle i ailagor.

Fe fydd disgwyl i siopau sicrhau fod y rheol ymbellhau o ddau fetr yn cael ei barchu, tra bod y gweinidog iechyd Vaughan Gething wedi dweud nad yw am weld torfeydd mawr yn ymgasglu wrth ymyl siopau.

• CANLLAW: Rhif R: Beth ydy o a pham ei fod yn bwysig

• AMSERLEN: Llinell amser coronafeirws yng Nghymru

• Y GIG: Sâl? Mae'r GIG 'dal ar agor' er gwaethaf y pandemig

• DYFODOL: Y goleuadau traffig: Beth sydd nesaf i Gymru?

Dadansoddiad Felicity Evans, golygydd gwleidyddol BBC Cymru

Mae gweinidogion y Senedd wedi awgrymu'n gryf y bydd siopau yn cael ailagor ond maen nhw'n awyddus hefyd i danlinellu'r neges mai 'pwyll pia hi'.

Hyd yma, mae Llywodraeth Cymru wedi tueddu i wneud un cyhoeddiad o bwys yn ystod bob adolygiad, ac yna i fonitro'r effaith mae hyn yn ei gael ar lefel 'R' y feirws.

Ond yn ddiweddar, maent hefyd wedi bod yn rhoi rhagrybudd i wahanol sectorau am ailagor - siopau yr wythnos nesa, yna ysgolion yr wythnos ganlynol.

Mae'n bosib fory y bydd y sector twristiaeth yn cael rhybudd i wneud paratoadau, fel bod hwythau hefyd yn barod i ailagor pan ddaw'r penderfyniad hwnnw.