Arestio dau wedi achos saethu ym Mhenarth

Mae rhan o'r ffordd ar gau tra bod ymchwiliad yr heddlu'n parhau

Mae dau berson wedi cael eu harestio wedi adroddiadau fod rhywun wedi saethu gwn ym Mhenarth.

Cafodd y gwasanaethau brys eu galw i ardal Redlands Road ychydig cyn 14:00 ddydd Iau.

Dywedodd Heddlu De Cymru fod swyddogion arfog wedi eu danfon mewn ymateb "fel cam rhagofal".

Cadarnhaodd llefarydd fod "dim adroddiadau o unrhyw anafiadau difrifol" a bod llanc wedi cael toriad i'w law.

Cafodd dyn 20 oed o ardal Y Mynydd Bychan, Caerdydd a llanc 16 oed o Lanrhymni eu cludo i orsaf heddlu Bae Caerdydd ar ôl cael eu harestio ar amheuaeth o fod â gwn yn eu meddiant.

Mae'r llu'n apelio ar y cyhoedd i osgoi'r ardal gan fod y ffordd ar gau i'r ddau gyfeiriad rhwng Heol Victoria a Heol Elfed.

Mae'r ymchwiliad i'r achos yn parhau, gyda swyddogion heddlu mewn amryw cyfeiriad yn y dref.

Mae'r llu'n awyddus i glywed gan unrhyw un all gynnig gwybodaeth neu luniau o'r digwyddiad.

Maen nhw'n gofyn i bobl ffonio'r heddlu ar 101, neu ffonio Taclo'r Tacle yn ddienw ar 0800 555111 gan ddyfynnu rhif digwyddiad 675.