Arbrawf archebu tocyn ar gyfer maes parcio ger Yr Wyddfa

Mae cerbydau wedi cael eu cludo o ardal Pen-y-Pass am dorri'r rheolau ddaeth i rym yng Ngorffennaf

Bydd yn rhaid i yrwyr archebu tocyn o flaen llaw cyn cael defnyddio'r maes parcio agosaf at gopa'r Wyddfa ar benwythnosau a'r gŵyl banc weddill haf eleni.

Mae'r maes wedi bod ar gau ar benwythnosau ers canol Gorffennaf i osgoi'r trafferthion a gododd wrth i ymwelwyr ddychwelyd yn eu miloedd i Eryri wedi i'r cyfyngiadau coronafeirws ddechrau llacio.

Mae Awdurdod Parc Cenedlaethol Eryri, Cyngor Gwynedd a Heddlu Gogledd Cymru nawr wedi adolygu'r mesurau brys a ddaeth i rym bryd hynny, gan gyhoeddi "gwelliannau pellach" i'r trefniadau parcio.

Mae'r gwasanaeth rhagarchebu'n dod i rym ar-lein am 00:00 nos Fercher ac mae yna rybudd bod "disgwyl i'r llefydd parcio werthu yn eithriadol o sydyn".

Mae cannoedd o ddirwyon wedi cael eu dosbarthu haf eleni m barcio'n anghyfreithlon yn ardal Pen-y-Pass

Wrth gyrraedd Pen-y-Pass fydd yn rhaid i yrwyr ddangos ebost yn profi eu bod wedi archebu tocyn o flaen llaw trwy wefan y Parc Cenedlaethol cyn cael mynediad i'r maes parcio.

Bydd angen i bawb arall ddefnyddio'r gwasanaeth Parcio a Theithio i Ben-y-Pass o Nant Peris a Llanberis.

Dywed llefarydd Awdurdod Parc Cenedlaethol Eryri fod y "peilot tymor byr... yn cael ei weithredu fel ffordd o asesu modelau rheoli newydd sy'n cyd-fynd â chynlluniau hir dymor o ddatblygu system parcio a thrafnidiaeth arloesol yn ardaloedd Yr Wyddfa ac Ogwen".

Bydd canlyniadau'r adolygiad hwnnw cael eu cyflwyno i'r partneriaid ym mis Medi.

Mae'r heddlu hefyd wedi bod yn rhoi conau ar yr A5 yn Nyffryn Ogwen i atal parcio anghyfreithlon

Ar sail casgliadau ymgynghoriad â chymunedau a phartneriaid ac asesiad o'r data, dywedodd llefarydd bod yna fomentwm ac awydd amlwg "i ddatblygu cynnig Twristiaeth Gynaliadwy integredig".

Mae'r argymhellion felly, meddai, "yn cynnwys atebion pellgyrhaeddol, cyfannol a chynaliadwy gan ddefnyddio model ar ffurf arddull Alpaidd, a allai drawsnewid ein hymagwedd tuag at deithio yn y rhanbarth".