Dirwyon i ymwelwyr ag Eryri am barcio ar y ffyrdd
- Cyhoeddwyd
Mae nifer o ymwelwyr wedi cael dirwyon am barcio yn anghyfreithlon
Mae miloedd o bobl wedi heidio i Eryri ddydd Sul, gyda pherchnogion "dros 500 o gerbydau" yn wynebu dirwyon am barcio ar ochr y ffordd.
Mae cannoedd o gerbydau wedi parcio'n anghyfreithlon ar ochr y ffordd rhwng Pen-y-Pass - y maes parcio agosaf at gopa'r Wyddfa - a Gwesty Pen-y-Gwryd.
Mae hynny'n golygu nad oes modd i geir sy'n teithio trwy'r ardal i basio ei gilydd mewn mannau.
Dywedodd Heddlu Gogledd Cymru bod "dros 500 o gerbydau" wedi parcio ar ochr y ffordd, a'u bod wedi mynychu i ddarparu cymorth i Gyngor Gwynedd.
Yn ôl gwefan Awdurdod Parc Cenedlaethol Eryri, dolen allanol roedd meysydd parcio Pen-y-Pass, Ogwen, Nant Peris a Phont Bethania yn llawn am 17:15 ddydd Sul.
Mae hefyd yn dangos fod meysydd parcio Llyn Tegid a Llangywer bron yn llawn.
Caniatáu cynnwys Twitter?
Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen polisi cwcis Twitter, dolen allanol a pholisi preifatrwydd, dolen allanol cyn derbyn. Er mwyn gweld y cynnwys dewiswch ‘derbyn a pharhau’.
Fe wnaeth Alun Gethin Jones, un o wardeniaid y parc cenedlaethol, apelio ar bobl i "osgoi Pen-y-Pass ar unrhyw achos".
"Mae'r ceir wedi parcio ar ffordd gyhoeddus yr holl ffordd o Ben-y-Pass i Westy Pen-y-Gwryd," meddai ar Facebook.
"Mae'n berygl iawn - dydy ceir a seiclwyr ddim yn gallu pasio yn ddiogel.
"Mae cadw pellter cymdeithasol yn cael ei anwybyddu, sy'n peryglu iechyd cyhoeddus yn yr ardal - mae hyn yn warthus.
"Dwi wedi bod yn cadw at y rheolau ac yn cadw fy mhellter am bedwar mis, ond rŵan mae hynny wedi'i daflu allan o'r ffenest."
Mae pryder fod problem parcio ar ochr y ffordd rhwng Pen-y-Pass a Gwesty Pen-y-Gwryd yn gwaethygu
Straeon perthnasol
- Cyhoeddwyd9 Gorffennaf 2020
- Cyhoeddwyd3 Gorffennaf 2020
- Cyhoeddwyd20 Mai 2020
