Yr Amgueddfa Genedlaethol yng Nghaerdydd yn ailagor

Ymwelydd diweddar dros dro ag Amgueddfa Cymru yng Nghaerdydd oedd Dippy y Diplodocus - ychydig cyn i'r pandemig daro

Ddydd Iau fe fydd yr Amgueddfa Genedlaethol yng Nghaerdydd yn ailagor i'r cyhoedd am y tro cyntaf mewn pum mis.

Fe fydd yr amgueddfa ar agor pedwar diwrnod yr wythnos i ganiatáu i staff lanhau'r safle'n drylwyr ar y diwrnodau y bydd ar gau.

Y bwriad ydy galluogi 1,200 o ymwelwyr bob dydd, ond bydd angen archebu tocynnau ar-lein ymlaen llaw.

Dywedodd cyfarwyddwr cyffredinol Amgueddfa Cymru, David Anderson eu bod "wrth ein boddau".

"Dyma pam rydyn ni'n bodoli, i weld ymwelwyr yn dod trwy'r drws ac yn cael eu rhyfeddu gan y gwrthrychau gwych sydd gennym ni," meddai.

Bydd yn rhaid i ymwelwyr â'r amgueddfa yng Nghaerdydd ddilyn canllawiau diogelwch coronafeirws a defnyddio'r system un ffordd sydd wedi ei gosod o amgylch pob un o'i arddangosfeydd.

Ni fydd yn bosibl cael mynediad i nifer fach o ystafelloedd yn yr oriel gelf oherwydd maint yr ystafelloedd, gan ei bod yn anodd cydymffurfio gyda rheolau ymbellhau cymdeithasol.

Mae David Anderson yn edrych ymlaen at groesawu ymwelwyr yn ôl a rhannu'r "trysor" sydd gan Gymru

Mae Amgueddfa Cymru wedi ailagor ei safleoedd yn raddol. Agorodd safle Sain Ffagan yn gynharach yn y mis, a bydd safleoedd eraill yn dilyn dros yr wythnos nesaf.

Ers dechrau'r cyfnod clo mae Amgueddfa Cymru wedi colli tua £400,000 pob mis tra bo'r amgueddfeydd wedi bod ynghau.

Dywedodd Mr Anderson: "Mae hynny'n arwyddocaol i ni neu i unrhyw amgueddfa. Rydyn ni wedi gwneud ein gorau i geisio dod o hyd i ffynonellau eraill i ddod dros hyn.

"Rydyn ni hefyd wedi defnyddio'r her o fod ar gau i weithio mewn cymunedau ledled Cymru. A nawr rydyn ni'n ymgynghori â'r cyhoedd ar yr hyn maen nhw am i'r amgueddfeydd fod dros y 10 mlynedd nesaf.

"Ond does dim byd cystal â dod yn ôl i'r safleoedd hyn ac unwaith eto gallu rhannu'r trysor hwn sydd gan Gymru."