Coronafeirws: 199 achos newydd, dim un farwolaeth

Daeth cadarnhad gan Iechyd Cyhoeddus Cymru bod 199 yn rhagor o bobl wedi profi'n bositif i Covid-19 dros y 24 awr ddiwethaf.

Ond nid oedd yr un farwolaeth o ganlyniad i'r haint yn ystod yr un cyfnod.

Mae'n golygu bod 20,644 o bobl wedi profi'n bositif yn ystod y pandemig, a bod nifer y marwolaethau yng Nghymru yn parhau i fod yn 1,603.

Cafodd 8,784 o brofion eu cynnal ddydd Sadwrn.

Nifer y bobl sydd wedi cael eu profi yng Nghymru bellach yw 456,192, gyda 435,548 yn profi'n negyddol.

• Covid-19: Pobl yn cymryd mwy o risgiau bob dydd

• 'Dim syndod petai Merthyr Tudful dan glo wythnos nesaf'

Roedd mwyafrif yr achosion newydd (80) yn ardal bwrdd iechyd Cwm Taf Morgannwg, sy'n cynnwys Rhondda Cynon Taf, Merthyr Tudful a Phen-y-bont ar Ogwr.

Fodd bynnag, dim ond tri achos newydd a gofnodwyd ym Merthyr.

Roedd 40 achos newydd yn ardal bwrdd iechyd Aneurin Bevan, sy'n cynnwys sir Caerffili, a 24 yn yr ardal Bwrdd Iechyd Prifysgol Caerdydd a'r Fro.

Fe gafodd 19 o achosion newydd eu cadarnhau yn Sir Gâr hefyd, gyda dim un yn Sir Benfro na Cheredigion.

Gwaith da yn ofer

Dywedodd Dr Giri Shankar, un o gyfarwyddwyr Iechyd Cyhoeddus Cymru:

"Rydym yn parhau i weld cynnydd cyson mewn achosion mewn llawer o gymunedau ledled Cymru, ac mae ein hymchwiliadau'n dangos bod llawer o'r rhain wedi'u trosglwyddo gan nad yw pobl yn cadw pellter cymdeithasol.

"Rydym hefyd yn gweld cynnydd yn nifer y bobl sy'n ddifrifol wael ac sydd wedi cael eu derbyn i'r ysbyty gyda Covid-19.

"Rydym yn poeni bod llawer o'r gwaith da sydd wedi'i wneud dros y misoedd diwethaf mewn perygl o fod yn ofer. Os bydd y sefyllfa'n parhau i waethygu, efallai y byddwn yn cyrraedd yr un lefelau o'r haint ag yr oeddem yn eu hwynebu'n gynharach eleni ym mis Mawrth ac Ebrill; a chyda hynny daw'r potensial i osod cyfyngiadau mwy estynedig yn genedlaethol."

"Nid yw'r coronafeirws wedi diflannu. Mae helpu i atal lledaeniad y feirws hwn i amddiffyn aelodau hŷn a bregus o'r teulu a ffrindiau yn parhau'n gyfrifoldeb i bob un ohonom. Dylid gwneud hyn drwy hunanynysu pan mae cais i wneud hynny, aros dau fetr oddi wrth bobl eraill, a golchi dwylo'n rheolaidd.