Alun Wyn Jones i dorri record capiau'r byd

Bydd Alun Wyn Jones yn cyrraedd y garreg filltir yn erbyn Yr Alban ddydd Sadwrn

Bydd Alun Wyn Jones yn torri record capiau'r byd trwy chwarae yn ei 149fed gêm ryngwladol ddydd Sadwrn.

Mae capten Cymru wedi ei ddewis i chwarae yn yr ornest yn erbyn Yr Alban yn y Chwe Gwlad - gêm a gafodd ei gohirio ym mis Mawrth oherwydd y pandemig.

Bydd y gêm yn cael ei chwarae ym Mharc y Scarlets yn Llanelli, gyda'r gic cyntaf am 14:15.

Bydd Alun Wyn Jones yn mynd heibio i record Richie McCaw am nifer y capiau rhyngwladol, gyda chyn-hyfforddwr Cymru, Warren Gatland yn talu teyrnged i Jones fel "un o'r chwaraewyr gorau erioed".

Fe fydd blaenasgellwr y Gleision, Shane Lewis-Hughes, yn ymddangos am y tro cyntaf dros ei wlad ddydd Sadwrn.

Ni chafodd Lewis-Hughes, 23, ei enwi yn y garfan gwreiddiol o 38.

Mae Liam Williams yn dychwelyd i gymryd lle'r asgellwr George North, tra bod y prop Tomas Francis a'r clo Will Rowlands wedi'u cynnwys.

Mae Shane Lewis-Hughes wedi cynrychioli tîm dan-20 Cymru

Mae mewnwr y Scarlets, Gareth Davies yn disodli Rhys Webb, sydd wedi'i anafu, gyda Lloyd Williams - yn hytrach na Kieran Hardy - ar y fainc.

Mae'r canolwr Nick Tompkins yn disgyn i'r fainc ar ôl cael ergyd i'w goes yn y golled i Ffrainc y penwythnos diwethaf, gydag Owen Watkin yn ymuno â Jonathan Davies yn y canol.

Nid oes lle yn y 23 i'r asgellwyr George North a Louis Rees-Zammit, na chwaith i Aaron Wainwright.

Tîm Cymru

Leigh Halfpenny; Liam Williams, Jonathan Davies, Owen Watkin, Josh Adams; Dan Biggar, Gareth Davies; Rhys Carre, Ryan Elias, Tomas Francis, Will Rowlands, Alun Wyn Jones (capt), Shane Lewis-Hughes, Justin Tipuric, Taulupe Faletau.

Eilyddion: Sam Parry, Wyn Jones, Dillon Lewis, Cory Hill, James Davies, Lloyd Williams, Rhys Patchell, Nick Tompkins.

Tîm Yr Alban

Hogg (capt), Graham, Kinghorn, Harris, Lang, Russell, Price; Sutherland, Brown, Z. Fagerson, Cummings, Gray, Ritchie, Watson, Thomson.

Eilyddion: McInally, Kebble, Berghan, Toolis, Du Preez, Steele, Hastings, Van der Merwe.