'Amhosib cadarnhau union achos damwain awyren ysgafn'

Yr Athro Last oedd yr unig berson oedd yn teithio ar yr awyren

Mae adroddiad wedi dod i'r casgliad nad yw'n bosib cadarnhau achos damwain awyren ysgafn Cessna ger Ynys Môn y llynedd a laddodd y peilot.

Roedd Yr Athro David Last, 79 oed o Lanfairfechan, yn teithio o Faes Awyr Caernarfon i'r Gogarth yn Llandudno ar 25 Tachwedd pan gollodd gysylltiad radar ger Ynys Seiriol.

Pan ddaethpwyd o hyd i weddillion yr awyren ar wely'r môr, roedd yn amhosib i'w codi ond fe lwyddodd ymchwilwyr i'w sganio.

Fe wnaethon nhw hefyd ail-greu amodau noson yr hediad mewn ymgais i gadarnhau beth aeth o'i le.

Llun o adenydd yr awyren Cessna, a ddiflannodd yn ardal Ynys Seirol

Dywed adroddiad y Gangen Ymchwilio i Ddamweiniau Awyren (AAIB): "Ni fu'n bosib nodi achos pendant y ddamwain.

"Tra roedd ond yn bosib archwilio'n awyren yn weledol o bell, doedd dim arwydd o o fethiant strwythurol, ac fe awgrymodd y prawf ail-greu na fethodd yr injan.

"Daeth y prawf i'r casgliad bod hi'n debygol bod yr awyren angen mewnbwn i'r offer llywio er mwyn cofnodi a chynnal cofnod o'r llwybr glanio terfynol.

"Roedd y peilot wedi bod yn wael yn ddiweddar, ond doedd dim tystiolaeth o analluogi meddygol, er ni ellir diystyru hynny fel achos posib."

Teithiodd yr awyren o Gaernarfon i gyfeiriad Llandudno cyn colli'r cysylltiad radar

Daeth deifwyr o hyd i gorff yr Athro Last dros bythefnos wedi i'r awyren ddiflannu.

Dywedodd ei deulu bryd hynny ei fod yn beilot profiadol.

Roedd yn ddarlithydd morwriaeth a chyfathrebu ym Mhrifysgol Bangor, ac yn cael ei ystyried yn arbenigwr yn ei faes a "ffigwr uchel ei barch".