Darganfod corff wedi diflaniad awyren ger Ynys Môn

Yr Athro Last oedd yr unig berson oedd yn teithio ar yr awyren

Mae Heddlu Gogledd Cymru wedi cadarnhau bod deifwyr oedd yn chwilio am beilot awyren aeth ar goll fis diwethaf wedi dod o hyd i gorff.

Roedd Yr Athro David Last yn teithio mewn awyren ysgafn Cessna o Faes Awyr Caernarfon i'r Gogarth yn Llandudno ac yn ôl ddydd Llun, 25 Tachwedd pan gollodd gysylltiad radar ger Ynys Seiriol.

• Gohirio rhan o'r chwilio am awyren

• Peilot ar goll wedi 'damwain awyren ysgafn'

Dywedodd yr Arolygydd Dave Corcoran bod tîm chwilio dan ddŵr heddluoedd y gogledd orllewin wedi dod o hyd i gorff ger Ynys Seiriol ychydig ar ôl 14:00 ddydd Iau.

"Mae teulu'r Athro David Last wedi cael gwybod ac yn cael cefnogaeth swyddogion arbenigol Heddlu Gogledd Cymru," meddai.

Mae'r llu hefyd wedi rhoi gwybod i'r crwner.

Mae'r Athro Last, darlithydd morwriaeth a chyfathrebu ym Mhrifysgol Bangor, wedi cael ei ddisgrifio fel arbenigwr yn ei faes a "ffigwr uchel ei barch".

Roedd awyren yr Athro Last yn teithio o Gaernarfon i gyfeiriad Llandudno pan ddiflannodd o gyswllt radar