Cyngor diogelwch brys wedi damwain trên Llangennech

Daeth 10 o danciau tanwydd oddi ar y cledrau

Mae cyngor diogelwch brys wedi cael ei gyhoeddi yn dilyn digwyddiad lle daeth trên nwyddau oddi ar y cledrau ym mis Awst eleni.

Nam ar y brêcs oedd yn gyfrifol am achosi damwain trên ger Llanelli wnaeth arwain at ollwng 330,000 litr o danwydd, yn ôl arolygwyr.

Fe wnaeth y nam achosi i'r trên adael y cledrau gan arwain at dân enfawr, gyda 300 o bobl ym mhentref Llangennech yn gorfod gadael eu cartrefi ar 26 Awst.

Fe ddylai cwmnïau sy'n gyfrifol am gynnal a chadw wagenni sydd fel arfer yn cario nwyddau peryglus adolygu eu prosesau er mwyn lleihau'r risg o'r brêcs yn methu, medd y Gangen Ymchwilio Damweiniau Rheilffordd (RAIB).

Dylai hyn gynnwys asesu cymhwysedd y staff a chyflwr y dyfeisiau diogelwch.

Roedd y 10 o wagenni yn cludo hyd at 75.5 tunnell o danwydd yr un

Cafodd y cyngor ei gyhoeddi fel rhan o ymchwiliad yr RAIB i'r digwyddiad pan ddaeth nifer o wagenni oddi ar y cledrau ger Llangennech.

Daeth adroddiad cychwynnol yr RAIB ym mis Medi i'r casgliad bod rhai o olwynion y trên wedi eu difrodi oherwydd nam ar y brêcs wedi i ddarn ddod yn rhydd.

Dywedodd yr ymchwilwyr nad oedd "unrhyw gofnod o wirio a oedd y dyfeisiau diogelwch wedi eu tynhau erioed".

Roedd y trên, syn eiddo i DB Cargo UK, yn teithio o burfa Robeston yn Aberdaugleddau i ganolfan dosbarthu tanwydd yn Theale, Berkshire.

Roedd yn teithio ar gyflymder o tua 30mya pan ddaeth oddi ar y cledrau.