Dyn wedi marw yn dilyn ymosodiad yng Nghaergybi
- Cyhoeddwyd
Digwyddodd yr ymosodiad yn ardal Stryd Thomas yng Nghaergybi
Mae dyn 58 oed wedi marw yn yr ysbyty yn dilyn "ymosodiad gwael" yng Nghaergybi ddydd Mawrth, 17 Tachwedd.
Dywedodd yr heddlu ei fod wedi llwyddo i gerdded i gartref ei bartner wedi'r ymosodiad.
Wedi hynny cafodd ei gludo i Ysbyty Gwynedd cyn cael ei drosglwyddo i ysbyty arbenigol yn Stoke, lle bu farw ddydd Iau.
Mae Heddlu'r Gogledd wedi dechrau ymchwiliad i lofruddiaeth ac yn apelio ar unrhyw un sydd â gwybodaeth am y digwyddiad i gysylltu â nhw.
Mae tri o bobl o'r ardal, dau ddyn 47 a 38 oed, a dynes 44 oed, wedi eu harestio mewn cysylltiad â'r ymchwiliad.
Dywedodd y Ditectif Brif Arolygydd Brian Kearney fod yr ymosodiad wedi digwydd rhwng 10:00 ac 11:00 ddydd Mawrth yr ardal Stryd Thomas a Mount Pleasant o Gaergybi.
"Rydym wedi canfod bod y dyn wedi llwyddo i gerdded i lawr Stryd Thomas heibio'r Gofadail i gyfeiriad ei bartner ger Ffordd Holborn," meddai.
Mae'r heddlu wedi sefydlu canolfan ymchwiliad yng ngorsaf heddlu Llangefni.