Beth am bach o Pobol y Cwm... a Phaned?
- Cyhoeddwyd
Mae Pobol y Cwm wedi bod ar ein sgrin ers 46 o flynyddoedd, tra bod podlediadau yn ffenomenon ychydig bach mwy newydd. Ond eleni mae'r ddau fyd wedi uno, wrth i dri ffan ifanc o'r brifddinas ddechrau podlediad newydd o'r enw Pobol y Cwm a Phaned.
Mae Betsan, Osian a Ioan yn ddisgyblion chweched dosbarth yn Ysgol Glantaf, ac wrth eu boddau yn trafod hynt a helynt y Cwm, yn pasio barn am eu hoff a chas gymeriadau, a rhannu barnau amhoblogaidd am eu hoff opera sebon.
Felly pam wnaeth y tri benderfynu dechrau podlediad am un o drysorau'r genedl?
Betsan: Cyn Covid, 'naethon ni ddechrau clwb yn yr ysgol, o'r un enw, i drafod Pobol y Cwm. Ond mond rhyw dri ohonon ni oedd yn troi fyny a wedyn ddaeth lockdown...
Ar ôl hynny 'naethon ni gwrdd, a siarad am Pobol y Cwm, beth oedden ni wedi ei fethu, a'r rhaglenni arbennig, a 'naethon ni feddwl...
Osian: …ni'n rili da am siarad…! O'n i'n meddwl 'neud podlediad, achos o'n i'n meddwl bydde fe'n rhywbeth hwyl. "Dylwn ni 'neud un am Pobol y Cwm!"
Hwnna o'dd yr amser pan oedd Pobol y Cwm ddim ar y teledu, ond o'dden nhw'n 'neud specials gyda'r cymeriadau. 'Naethon ni jest 'neud e ac o'dd 'na gynulleidfa i wrando arno fe.
O'n ni ddim yn poeni am neb yn gwrando, a dyw e ddim fel bo' ni'n siarad am Eastenders. Ond pob wythnos, mae'r gynulleidfa yn tyfu, diolch i bobl sydd yn tweetio amdano fe.
Caniatáu cynnwys Twitter?
Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen polisi cwcis Twitter, dolen allanol a pholisi preifatrwydd, dolen allanol cyn derbyn. Er mwyn gweld y cynnwys dewiswch ‘derbyn a pharhau’.
'Dwi acshyli'n enjoio hwn'
O sgwrsio am hoff gyplau'r gyfres i gael rant tanbaid am steil ffasiwn rhai o'r cymeriadau, mae'r tri ffrind wrth eu boddau yn trin a thrafod a dadansoddi'r penodau.
Ond beth am Pobol y Cwm sydd yn ei gwneud yn gyfres werth ei gwylio?
Betsan: Pan o'n i'n clywed am Pobol y Cwm, o'n i wastad wedi troi fy nhrwyn arno fo yn meddwl 'thing i hen bobl 'di hwnna'. Ond pan nes i wylio fo, o'n i'n meddwl 'o, dwi acshyli'n enjoio hwn'.
Mae'r pynciau yn eitha' cyfoes drwy gydol o a mae o'n hawdd i'w drafod. Dwi'n annog unrhyw un i'w wylio fo.
Ioan: Ges i nghroesawu i Pobol y Cwm gan Betsan ac Osian oherwydd y clwb - "Ti mo'yn ymuno gyda'r clwb? Iawn, go on 'te!" Ers i'r clwb ddechrau rili, ac ar ôl y lockdown, ail-afael ynddo a dechrau podlediad!
Osian: Mae e ar yr un lefel, yn fy marn i, ag Eastenders a Coronation Street, jest bod e yn yr iaith Gymraeg. A dwi'n meddwl fod hwnna'n rili pwysig i'n cymdeithas ni - y gymdeithas Gymraeg - achos mae e'n hybu'r iaith ond mewn ffordd sydd ddim yn ffurfiol. Dyw e ddim yn iaith anodd i'w deall a maen nhw'n siarad fel ni'n siarad.
Mae'r tri yn mwynhau trin a thrafod antics Kelly, Dylan a Kath, a thrigolion eraill Cwmderi
Ioan: Fy hoff gymeriad, rhaid i fi ddweud, ydi Kelly. Mae hi'n eitha' doniol. Wythnos diwetha' pan o'dd hi'n cican off, o'n i fel 'w go Kelly!'. Kelly a Dani - pan mae'r ddwy yna gyda'i gilydd, mae e'n grêt!
Betsan: Dwi'n licio Colin. Mae o'n annwyl, a mae o jyst yn gwneud pethau bach i wneud i ti chwerthin. Mark hefyd... dwi jyst yn licio'r straeon bach; ddim y straeon mawr, ond y pethau bach sy'n eitha' entertaining i wylio.
Dwi hefyd, mae rhaid i mi ddweud, yn rili licio Dylan, ond dwi'n licio'i gasáu o.
Osian: Fi'n rili hoffi Kath. Hi yw'r math o berson fi mo'yn bod pan fi'n hŷn! Cael yr hyder yna i beidio poeni. I fi, hi yw'r gorau yn y Cwm.
Mae Osian, Betsan a Ioan yn recordio'r podlediad yn ystod eu hawr ginio ac yn cyhoeddi pennod newydd bob dydd Sul
Tri ffrind yn cael sgwrs
Mae Ioan ac Osian wedi adnabod ei gilydd ers yr ysgol gynradd, ac ar ôl i Betsan symud i lawr o'r gogledd pan oedd hi ym mlwyddyn 10, mae'r tri wedi dod yn ffrindiau drwy eu diddordeb mewn drama a pherfformio.
Felly, yn ei hanfod, mae'r podlediad yn dri ffrind yn mwynhau cael sgwrs am un o'u hoff bynciau...
Osian: Ni jest yn cael chat am Pobol y Cwm, fel tase ni yn, ond bo' ni'n recordio fe a rhoi e lan ar y we.
Betsan: 'Dan ni'n trio cael rhyw strwythur, ond yn amlwg achos ei fod o'n bodlediad eitha' newydd, 'dan ni dal yn dod i arfer efo fo. 'Dan ni'n trafod be' sydd wedi digwydd, ond mae 'na lot o fynegi barn am gymeriadau.
Weithiau mae 'na straeon 'da ni'n rili uniaethu efo fo - sef hanner y rheswm 'dan ni'n licio Pobol y Cwm yn y lle cynta'. 'Dan ni wedyn yn rhoi Paned y Bennod...
Osian: Ni'n judgo'r bennod, ac yn dweud pa fath o bennod ni'n meddwl fase'r bennod yna yn cael.
Betsan: I rai gwael, 'dan ni'n rhoi llaeth stêl...
Osian: Os mae mwy o bobl ishe fe, mae hwnna'n rhoi'r egni i ni 'neud e. Ond hyd yn oes os oes neb yn gwrando arno fe, mae ganddon ni dal y tân yn ein bol i 'neud y podlediad.
Y bwriad yw cario 'mlaen i 'neud e, a chael hwyl!
Hefyd o ddiddordeb: