Oedi addysg yn 'ergyd arall' i fyfyrwyr prifysgol

Mae oedi parhaus cyn ailddechrau addysg wyneb yn wyneb yn "ergyd arall" i fyfyrwyr prifysgol sydd eisoes "wedi colli cysylltiad â'u hastudiaethau", yn ôl undeb NUS Cymru.

Mae myfyrwyr yn cael eu hannog i aros adref tan y Pasg, oni bai am nifer fach sy'n cael dychwelyd i ddilyn cyrsiau iechyd a chyrsiau ymarferol.

Golyga penderfyniad prifysgolion Cymru'r wythnos hon bod myfyrwyr nawr yn gorfod cwblhau o leiaf traean o'r flwyddyn academaidd bresennol ar-lein.

Yn ôl Llywydd NUS Cymru, Becky Ricketts, mae'n hanfodol i roi'r "gefnogaeth iechyd meddwl, academaidd ac ariannol" angenrheidiol i fyfyrwyr i'w cynnal drwy'r misoedd nesaf.

Dywed Llywodraeth Cymru eu bod wedi rhoi £50m at gefnogi myfyrwyr.

'Mae'r straen yn eich bwrw'

Roedd Abbie Baker, 19, yn fyfyriwr rheoli twristiaeth blwyddyn gyntaf ym Mhrifysgol Abertawe. Roedd yn "emosiynol iawn" o glywed na allai ddychwelyd i'r campws tan ddiwedd y tymor presennol.

"Mae straen addysg prifysgol ar-lein a pheidio gwybod beth sy'n digwydd yn eich bwrw, a ry'ch chi'n torri," meddai.

Bu'n rhaid symud yn ôl adref i Ben-y-bont ar Ogwr cyn Nadolig, ond roedd yn dal i dalu am ystafell yn Abertawe.

"Er nad oedd modd cymdeithasu â myfyrwyr eraill, roedd dal synnwyr o ryddid yna. Dydw i ddim yn agos at lawer o bobl yma, felly rwy'n teimlo'n eithaf unig ac mae wir wedi effeithio ar fy iechyd meddwl.

"Nes i ddim meddwl bydde mor anodd ag y mae wedi bod yn nhermau cyfathrebu a chefnogaeth."

Mae Abbie Baker yn cwestiynu ei phenderfyniad i fynd i'r brifysgol eleni

Mae gwahaniaeth mawr rhwng dilyn cwrs Safon Uwch a dysgu ar-lein i fyfyrwyr blwyddyn gyntaf, medd Abbie.

"Dydw i ddim yn gwneud cystal ag yr o'n i wedi disgwyl oherwydd, o 'mhrofiad i, dydyn ni heb gael yr arweiniad.

"Ry'ch chi'n meddwl 'falle nad ydw i'n fyfyriwr digon da, dydw i ddim yn haeddu bod yma' oherwydd y graddau hynny. Rwy'n deall bod e'n hollol wahanol i Safon Uwch ond mae'r teimlo'n ddiraddiol iawn, rhoi gymaint o ymdrech i rywbeth ond rydych chi mewn gwirionedd wedi ei wneud yn hollol anghywir.

"Abertawe oedd fy newis cyntaf... nawr rwy'n teimlo falle na ddyliwn i wedi dod yn y lle cyntaf.

"Mae'n anodd gyda'r holl waith ar-lein a straen yr hyn sy'n digwydd o 'nghwmpas. Mae wedi cael effaith ar sut rwy'n dysgu, ac yna ar y traethodau a'r arholiadau.

"Mae wedi gadael ei ôl arna'i ac er mae'r brifysgol yn darparu gwasanaethau i bobl sy'n cael trafferth, rwy'n teimlo 'mod i'n faich ar bawb."

Mae Prifysgolion Cymru a Llywodraeth Cymru wedi mynegi gobaith bod y penderfyniad i oedi addysg wyneb yn wyneb tan o leiaf Pasg yn rhoi "sicrwydd" i fyfyrwyr.

Mae Shreshth Goel, myfyriwr rhyngwladol ym Mhrifysgol Caerdydd, wedi teimlo'n "unig" wrth astudio ar-lein yn yr wythnosau diwethaf.

Methodd â threulio'r Nadolig adref yn India, a bydd wedi byw ar ben ei hun am bedwar mis erbyn Pasg.

"Mae'n eich bwrw weithiau," meddai'r myfyriwr y gyfraith ail flwyddyn, "ond mae yna gefnogaeth hefyd.

Gwerth am arian

"Dyw gwneud gwaith ar-lein ddim byd tebyg i ddysgu mewn person, ond ry'n ni'n deall nad oes bai ar neb. Mae'n fwy anodd i ganolbwyntio achos mae mwy i dynnu'ch sylw pan ry'ch chi'n neud e ar-lein."

Pryder mawr yw faint o werth am arwain mae'n cael o'r cwrs wrth dalu £17,000 y flwyddyn.

"Pan ry'ch chi'n dod o wlad arall, ry'ch chi nid yn unig yn talu am yr holl addysg ond hefyd am y profiad."

Rhaid i ddulliau asesu ystyried amgylchiadau myfyrwyr, medd Becky Ricketts

Mae'r pandemig eisoes wedi cael "effaith ddinistriol" ar fyfyrwyr, medd Becky Ricketts.

"Mae Llywodraeth Cymru a'r sefydliadau wedi rhoi'r buddsoddiad sydd ei daer angen i wasanaethau iechyd meddwl, academaidd ac ariannol eleni," meddai.

"Ond gyda llawer o fyfyrwyr nawr yn wynebu mwy o amser o'r campws, mae'n hanfodol i'r gefnogaeth yma gyrraedd pawb sydd ei angen.

"Mae myfyrwyr, yn naturiol, yn poeni am orfod dysgu ar-lein am fisoedd lawer heb gefnogaeth wyneb yn wyneb.

"Nid pob myfyriwr sydd â'r dechnoleg, y gofod na'r cysylltiadau i ddysgu'n effeithiol o adref, ac mae'n rhaid i ddulliau asesu adlewyrchu hynny."

Dywedodd Llywodraeth Cymru eu bod yn gobeithio y byddai eu cyllid ychwanegol yn helpu prifysgolion i gynnig cefnogaeth ychwanegol i fyfyrwyr, gan gynnwys "cefnogaeth iechyd meddwl a lles" a "mynediad i gyllid digidol a chaledi."