Arestio 12 a thri yn yr ysbyty wedi aflonyddwch difrifol

Mae'r ffordd ar gau wrth i'r heddlu barhau i gynnal ymholiadau

Mae 12 o ddynion wedi cael eu harestio yn dilyn "aflonyddwch difrifol" a arweiniodd at gau ffordd brysur ar gyrion Caerdydd.

Bu'n rhaid i Heddlu De Cymru ddefnyddio pwerau arbennig i stopio a chwilio pobl ar Wentloog Avenue, Tredelerch, sy'n cynnwys safle teithwyr Shirenewton, er mwyn "atal trais pellach".

Cafodd y dynion eu harestio ar amheuaeth o gythrwfl treisgar, ymosod a chael arfau yn eu meddiant.

Mae tri dyn yn cael triniaeth ysbyty, gan gynnwys dyn 27 oed sydd ag anafiadau all newid ei fywyd.

Mae'r ddau ddyn arall, sy'n 25 a 55 oed, ag anafiadau difrifol.

Dywed y llu bod nifer o arfau wedi eu canfod ac mae swyddogion fforensig yn cynnal archwiliad yn yr ardal.

Y gred yw bod pawb oedd yn rhan o'r digwyddiad yn nabod ei gilydd.

Dywedodd Heddlu De Cymru dylid ceisio osgoi'r ardal tra bod ymchwiliadau'n parhau

Cafodd yr heddlu eu galw yn dilyn adroddiadau o ymosodiad ddydd Sul am 16:00.

Mae hysbysiad Adran 60 - sy'n rhoi'r pŵer i swyddogion chwilio unrhyw un mewn ardal benodol - yn parhau mewn grym tan 17:00 brynhawn Llun.

"Cafodd yr hysbysiad ei weithredu yn dilyn aflonyddwch difrifol," meddai'r heddlu, sy'n apelio am wybodaeth.

"Bydd yn parhau mewn lle tra bod ymholiadau'n mynd ymlaen gyda'r bwriad o atal trais pellach."

Mae'r ffordd ar gau i'r ddau gyfeiriad rhwng Casnewydd a Chaerdydd ac mae pobl yn cael eu cynghori i osgoi'r ardal.