Dedfrydu giang a gludodd gyffuriau mewn bocsys melysion

Darnau o dystiolaeth yn cynnwys pecynnau Tic Tac yr oedd y ginag yn eu defnyddio i gario cyffuriau

Mae 12 aelod o giang cyffuriau wedi cael eu carcharu am gyfanswm o 50 mlynedd, yn dilyn ymchwiliad pum mis gan Heddlu Gogledd Cymru.

Yn dilyn achos yn Llys y Goron Yr Wyddgrug, derbyniodd aelod arall o'r grŵp ddedfryd wedi'i gohirio.

Roedd y criw, dan arweiniad Richard Griffiths, yn cyflenwi cyffuriau Dosbarth A yn ardal Wrecsam.

Roedd y giang yn storio cyffuriau mewn lleoliadau gwledig, ac yn eu cario o le i le mewn bocsys y melysion Tic Tac.

Ch-Dd: Adrian Brindley, Aled Roberts, Blake Lloyd Roberts, Dwayne Pritchard, Gemma Pearce, Glyn Edwards, Jayne Pritchard, John Luke Griffiths, Ryan Philip Edwards, Sion Alaw Griffiths, Stuart Thomas Clarke, a Thomas Faulds

Ar gyhuddiad o gynllwynio i gyflenwi cyffuriau Dosbarth A carcharwyd:

• Richard Griffiths am 6 mlynedd 8 mis;

• Sion Griffith 5 mlynedd 7 mis;

• Glyn Edwards 5 mlynedd 4 mis;

• John Luke Griffiths 5mlynedd 2 fis;

• Thomas Foulds 5 mlynedd 1 mis;

• Stuart Clarke 4 blynedd 8 mis;

• Blake Roberts 4 blynedd 6 mis;

• Jayne Pritchard 2 flynedd 9 mis;

• Aled Roberts 2flynedd 8 mis;

• Adrian Brindley 2flynedd 4 mis.

Ar gyhuddiad o ymwneud â chyflenwi cyffuriau Dosbarth A derbyniodd Ryan Edwards a Dwayne Pritchard ddedfryd o 2flynedd 4 mis yr un o garchar.

Am fod yn aelod o grŵp troseddol cafodd Gemma Clarke ddedfryd o flwyddyn o garchar wedi'i gohirio am 18 mis.

Dywedwyd mai Richard Griffiths oedd arweinydd y grŵp

Yn dilyn y dyfarniad dywedodd y Ditectif Arolygydd Mark Hughes bod y giang "yn drefnus a soffistigedig".

"Roedd hyn yn cyflwyno nifer o drafferthion i'r ymchwiliad, yr wyf yn falch o ddweud ein bod wedi dod drostynt drwy waith caled, cyson a pharhaus," meddai.

"Rwyf wrth fy modd hefo'r dedfrydau gan fod hyn yn dangos ein bod fel llu yn benderfynol o ddod â phobl sy'n dod â dioddefaint i drefi a phentrefi gogledd Cymru gerbron y llysoedd."