Etholiad 2021: Manylion annibyniaeth 'ddim yn bosibl eto'
- Cyhoeddwyd
Adam Price: Rhaid i ni symud ymlaen o'r holl ddadlau am Brexit
Dim ond os bydd Plaid Cymru yn ennill etholiadau'r Senedd mis nesaf y gall hi fynd i'r afael â gwneud "gwaith manwl" ar annibyniaeth, yn ôl arweinydd y blaid.
Mae Plaid Cymru wedi addo cynnal refferendwm ar annibyniaeth o fewn y pum mlynedd nesaf os mai hi fydd yn creu Llywodraeth wedi'r etholiad ar Mai 6.
Dywedodd Adam Price nad yw'n bosib rhoi manylion pendant am yr arian cyfred y byddai Cymru yn ei ddefnyddio a sut y byddai'r ffin yn gweithredu tra bod Plaid Cymru yn wrthblaid.
"Gallwch chi ond gwneud y gwaith manwl yma pan ydych chi mewn llywodraeth," meddai.
Fe wnaeth Mr Price y sylwadau yn rhaglen gyntaf 'Ask the Leader' BBC Cymru.
Mae Plaid Cymru yn addo Comisiwn Cenedlaethol i "sicrhau'r ymwybyddiaeth, cyfranogiad a'r ymglymiad mwyaf" mewn refferendwm annibyniaeth o fewn tymor nesaf y Senedd os yw'n ffurfio llywodraeth ar ôl 6 Mai.
Wrth siarad ar 'Ask the Leader', dywedodd Mr Price fod "cyfeiriad eang y blaid yn glir".
"Rydyn ni'n credu mewn Cymru annibynnol a fydd yn sicrhau dyfodol economaidd gwell i'n gwlad.
"O ran y manylion ar gwestiynau technegol, dim ond Comisiwn Cenedlaethol gyda'r arbenigedd a'r adnoddau y gall ateb hynny.
"Bydd y cwestiynau yma yn cael eu hateb yn y cyfnod cyn y refferendwm," meddai.
POLISÏAU: Cymharwch addewidion y pleidiau
BLOG VAUGHAN RODERICK: Faint o obaith sydd gan y pleidiau llai?
PODLEDIAD: Llond bol o bleidleisio?
Wrth gael ei gwestiynu am ba arian cyfred y byddai Cymru yn ei ddefnyddio ac am sut y byddai'r ffin yn cael ei gweithredu, dywedodd Mr Price: "Gallwch ond wneud y gwaith manwl o fewn llywodraeth, ni allwch wneud hynny pan yn wrthblaid".
Ychwanegodd: "Beth wnaeth llywodraeth yr SNP pan gawson nhw eu hethol? Fe wnaethon nhw gyhoeddi Papur Gwyn. Dim ond tra bo chi mewn llywodraeth y gallwch chi wneud hynny.
"Bydd yr holl gwestiynau yma am ddyfodol economaidd Cymru ac ati, arian cyfred, a'r holl faterion hyn yn cael sylw gan waith manwl y Comisiwn - a byddai'r gwaith yn dechrau ar unwaith."
Mae etholiadau Senedd Cymru ddydd Iau Mai 6.