Ymchwiliad i dân angheuol yn Hwlffordd
- Cyhoeddwyd
Cafodd y gwasanaethu brys eu galw am 22:40 nos Lun
Mae'r heddlu a'r gwasanaeth tân yn ymchwilio i dân angheuol yn Hwlffordd, Sir Benfro.
Cafwyd hyd i gorff menyw ar y llawr gwaelod.
Bu'n rhaid gwagio tai cyfagos tra bod diffoddwyr yn ceisio rheoli'r tân nos Lun.
Dywedodd llefarydd ar ran Gwasanaeth Tân ac Achub Canolbarth a Gorllewin Cymru nad oeddynt yn credu fod unrhyw un arall yn y tŷ ar y pryd.
Bu diffoddwyr ar y safle tan 02:00 fore Mawrth yn rheoli'r tân
Fe wnaeth swyddogion yr heddlu a'r gwasanaeth tân ddod nôl i'r adeilad ddydd Mawrth i ymchwilio i achos y tân
Cafodd criwiau o Hwlffordd, Aberdaugleddau ac Arberth eu galw am 22:40.
Mae'n debyg i'r tân ddechrau ar lawr gwaelod yr adeilad cyn ymledu i weddill y tŷ dau lawr yng Nghlôs Siskin.
Mae swyddogion arbenigol Heddlu Dyfed-Powys yn rhoi cymorth i deulu'r ddynes a fu farw, ac mae Swyddfa'r Crwner wedi cael gwybod.