Agor a gohirio cwest yn achos marwolaeth Ynysybwl

Mae cwest wedi ei agor a'i ohirio yn achos marwolaeth gŵr busnes 53 oed yn Rhondda Cynon Taf mewn tŷ oedd ar dân.

Clywodd y gwrandawiad ym Mhontypridd bod Roger Selway wedi marw o anaf gwn i'w ben.

Roedd Heddlu De Cymru wedi cadarnhau, ar ôl cael eu galw i'w gartref ger Ynysybwl ar 27 Ebrill, nad oedd y farwolaeth yn cael ei thrin fel un amheus.

Clywodd Llys Crwner Canol De Cymru bod cymar Mr Selway adref ar y pryd" ac fe glywodd hithau sŵn bang".

Cafodd hyd iddo "yn gorwedd ar ei gefn" ar lawr cyntaf yr eiddo, sydd tua milltir o'r pentref. Cafodd to'r eiddo ei ddinistrio yn y tân.

Roedd Mr Selway newydd addasu'r hen ysgubor ac yn byw yno gyda'i gymar ers rhyw 18 mis.

Cafodd ei ddisgrifio gan gymdogion fel dyn "caredig a chyfeillgar". Yn ôl perchnogion ceffylau lleol, a'i welodd yn aml yn mynd â'i gŵn am dro, roedd ganddo ddiddordeb mewn gweithgareddau cefn gwlad, gan gynnwys saethu.

Cafodd ei adnabod trwy olion bysedd ar 4 Mai yn dilyn archwiliad post mortem ar 29 Ebrill.

Cafodd y cwest ei ohirio gan Hydref 20, 2022.