MJ Williams: Y Cymro Cymraeg sy'n cael llwyddiant yn Bolton

Mae Jordan - neu MJ - Williams wedi chwarae dros Rochdale, Blackpool a Bolton ers gadael Lerpwl yn 2018

Mae pêl-droediwr o Wynedd yn anelu i gynrychioli ei wlad eto ar ôl gwella o anafiadau oedd yn peryglu'i yrfa.

Mae Jordan Williams, sy'n enedigol o Fangor, bellach yn serennu i dîm Bolton Wanderers sydd newydd sicrhau dyrchafiad i Adran Un.

Ond mae ei ddyled yn fawr i Lerpwl, meddai ef a'i deulu, a dalodd £150,000 iddo gael llawdriniaeth ar ei ben-glin dair blynedd yn ôl.

Roedd yr amddiffynnwr 25 oed - sydd bellach yn cael ei adnabod fel MJ Williams - ar lyfrau Lerpwl ar y pryd, cyn cael ei ryddhau yn fuan wedyn.

Dywedodd Jordan wrth raglen Dros Frecwast BBC Radio Cymru: "Ma' hi wedi bod yn anodd ar ôl cael yr injury - o'n i'n meddwl na faswn yn chwara' eto.

"Ond diolch byth ar ôl gwaith caled o'dd o werth y boen i weld Bolton yn cael promotion.

"Dwi rŵan isio trio cael lle yn tîm Cymru gobeithio."

"O'n i'n meddwl na faswn yn chwara' eto," meddai Jordan

Bu Jordan - cyn-ddisgybl yn Ysgol y Garnedd - yn chwarae i dîm Penrhos ac Academi Bangor, cyn symud i Wrecsam ac yna i Lerpwl.

"Gafodd o'i sgowtio i chwarae i Wrecsam ac roedd o'n trainio tua pedair gwaith yr wythnos so nes i symud wedyn i fyw i Wrecsam iddo fo gael mwy o gyfle," meddai ei fam, Alison Williams, wrth Dros Frecwast.

"Ac wedyn pan oedd o'n 14 fe gafodd o'i sgowtio i Man City, Lerpwl a Everton.

"'Nath o gymryd Lerpwl ac roedd o'n mynd ar siwrna' dda iawn a nes i symud i Lerpwl i fyw 'efo fo tan ei fod o'n 19, wedyn nes i symud 'nôl."

Roedd Bolton yn 17eg yn Adran Dau ym mis Chwefror, cyn ennill 16 allan o 22 i orffen yn drydydd. Fe arwyddodd Williams (chwith) i'r clwb ym mis Chwefror

Ond mae anafiadau wedi bod yn rhoi trafferthion i Jordan drwy gydol ei yrfa.

"'Nath o ddechra' pan o'dd o tua 16 oed, fel hogyn bach roedd ganddo fo drafferth 'efo pengliniau fo ond wnaethon ni jyst adael o, y specialist yn dweud bydd o'n iawn, 'paid â siarad llawar amdano fo'.

"Ond o'n i byth yn meddwl y bydda fo isio chwarae pêl-droed so dwi'n meddwl 'efo fo'n chwara' pêl-droed gymfaint mor ifanc na'th o ddechrau mynd yn waeth.

"Dwi meddwl gafodd o dri triniaeth ond yr un tair blynedd yn ôl oedd yr un massive.

"'Swn i jyst yn licio dweud diolch yn fawr iawn i Lerpwl - os 'sa Jordan wedi bod yn League One ar yr amser yna bydda fo byth wedi cael y driniaeth yma achos roedd o'n costio tua £150,000 so oedd o mewn un ffordd yn lwcus iawn bod o dal ar lyfra' Lerpwl."

Mae Gethin Jones - Cymro Cymraeg o Borthmadog - ymysg llond dyrnaid o Gymry sy'n chwarae i Bolton

Mae Jordan wedi cael blas ar y llwyfan rhyngwladol yn barod.

Mae wedi ennill capiau i'r timau ieuenctid, gan gynnwys y tîm dan-21, ac yn 2015 fe gafodd ei enwi yng ngharfan Chris Coleman.

"Roedd o ar y fainc i dîm cynta' Cymru ac aethon ni lawr i Gaerdydd i wylio'r gêm," meddai Alison.

"Ddoth o ddim ar y diwrnod yna ond o'n i mor prowd bod o ar y fainc i fod yn onest.

"Hwnna wan ydi'r aim [cynrychioli Cymru], hwnna mae o isio mwy na dim byd a - i fi'n bersonol - dwi'n meddwl neith o.

"Dyna sydd rhaid ni gyd feddwl rŵan, yn positif. Fel mae Jordan yn ddeud, does 'na'm isio edrych 'nôl rŵan - i ni gyd symud ymlaen a gobeithio neith bob dim ddod at ei gilydd.

"Dwi ddim yn meddwl bod llawer o bobl yn sylweddoli faint o waith caled mae o wedi rhoi mewn i fod lle mae o erbyn rŵan, ond dwi mor prowd ohono fo."