Carchar am achosi marwolaeth trwy yrru'n beryglus

Bu farw Ellie Bryan, oedd yn dod o Aberystwyth, wedi'r ddamwain ar 16 Tachwedd 2019

Mae dyn 19 oed o Aberystwyth wedi cael dedfryd o garchar ar ôl pledio'n euog i gyhuddiad o achosi marwolaeth menyw 18 oed trwy yrru'n beryglus.

Cafodd Dylan Wyn Benjamin o Bontnewydd ddedfryd o dair blynedd a phedwar mis yn sgil gwrthdrawiad a laddodd Ellie Bryan ar yr A487 ger troad Comins Coch ym mis Tachwedd 2019.

Plediodd yn euog hefyd i ddau gyhuddiad o achosi anaf difrifol trwy yrru'n beryglus.

Dywedodd y barnwr yn Llys y Goron Abertawe bod Benjamin yn gyrru'n rhy gyflym wrth deithio tua'r troad ar gyrion Aberystwyth a bod y gwrthdrawiad felly'n "anochel".

Cafodd Benjamin a dau deithiwr arall oedd yn y cerbyd anafiadau difrifol.

Cafodd ei wahardd rhag gyrru am bum mlynedd ac wyth mis.

Arwydd yr heddlu ger safle'r gwrthdrawiad

Collodd Benjamin reolaeth ar y car ar droad ger Comins Coch, taro coeden ac yna taro cerbyd arall oedd yn teithio tuag ato.

Yn ôl tystiolaeth yr heddlu, roedd cloc cyflymder y car wedi stopio ar 72 mya, a 50 mya oedd y cyflymder uchaf o ran gyrru trwy'r troad yn ddiogel.

Nid oedd Ellie Bryan na merch arall oedd yng nghefn y car yn gwisgo gwregysau. Cafodd Ellie ei lladd.

Cafodd Benjamin a'r ddau deithiwr arall yn y Vauxhall Astra anafiadau difrifol, ac fe gafodd gyrrwr y cerbyd arall anaf hefyd.

'Teimlo'r golled yn ddyddiol'

Mewn datganiad a gafodd ei ddarllen ar ei rhan, dywedodd mam Ellie, Charlotte Bryan bod y teulu wedi methu â dod i delerau gyda'i marwolaeth.

Roedd perthnasau yn eu dagrau wrth iddi ddatgan bod "marwolaeth Ellie wedi gadael bwlch enfawr yn ein bywydau ac rydym yn parhau i deimlo'r golled yn ddyddiol".

Ychwanegodd: "Dweud wrth ein plant eraill bod eu chwaer wedi marw oedd y peth anoddaf rwy' wedi gorfod ei wneud erioed."

Blodau yn nodi lleoliad y gwrthdrawiad a laddodd Ellie Bryan

'Edifar'

Dywedodd bargyfreithiwr yr amddiffyn bod Benjamin "mor edifar ag y gallai unrhyw un fod" a'i fod "yn talu'r pris am yr hyn ddigwyddodd".

Clywodd y llys mai dyma'r tro cyntaf i'r diffynnydd gael ei erlyn, ac nad oedd alcohol na chyffuriau'n ffactor yn y digwyddiad.

Ychwanegodd bod Benjamin yn cofio dim o'r digwyddiad. Treuliodd 10 wythnos yn yr ysbyty, ac roedd mewn coma am bythefnos wrth i glotiau gwaed gael eu tynnu o'i ymennydd.

Wrth ddedfrydu Benjamin, dywedodd y Barnwr Geraint Walters bod yr hyn a wnaeth wedi cael "effaith ddinistriol ar nifer o bobl".

Dywedodd na fyddai'r un ddedfryd "yn gwneud y boen a'r dioddefaint yn haws" a bod y creithiau'n para am byth i'r teulu.