Ystyried cadw Tŷ Pawb dan reolaeth Cyngor Wrecsam

Bydd Cyngor Wrecsam yn ystyried cadw canolfan gelfyddydol Tŷ Pawb o dan reolaeth yr awdurdod

Mae'n ymddangos y bydd marchnad a chanolfan gelfyddydau yn Wrecsam yn aros o dan reolaeth y cyngor am y dyfodol rhagweladwy.

Daw hyn wedi i ffynonellau incwm yng nghanolfan Tŷ Pawb ddymchwel oherwydd y pandemig.

Pan agorodd y ganolfan yn Ebrill 2018, dywedodd ymgynghorwyr y dylai rheolaeth o'r adeilad gael ei drosglwyddo i ymddiriedolaeth.

Fe wnaeth bwrdd gweithredol Cyngor Wrecsam bleidleisio i gadw'r lle dan reolaeth yr awdurdod am o leiaf tair blynedd, ond mae disgwyl i'r cyfnod yna gael ei ymestyn oherwydd effaith y pandemig.

Dywed adroddiad fydd yn cael ei ystyried gan gynghorwyr ddydd Mawrth: "Mae'n hanfodol bod Tŷ Pawb yn cryfhau'r model busnes drwy fabwysiadu dull cyfannol.

"Mae dyfodiad Covid wedi cael effaith fawr, a'n cred ni yw bod angen adfywio cyn y gallwn ystyried dull gwahanol o reolaeth."

Pan agorwyd Tŷ Pawb dywedodd Cyngor Wrecsam ei fod yn "ddatblygiad cyffrous" i'r dref

Yn y flwyddyn ariannol 2019/20 fe wnaeth y ganolfan orwario o tua £88,000, yn rhannol oherwydd y pandemig a mesurau'r cyfnod clo tua diwedd y flwyddyn.

Ond yn 2020/21 fe wnaeth Tŷ Pawb danwario o tua £24,000 wrth i swyddogion fedru hawlio grantiau llywodraeth i wneud yn iawn am golli incwm.

Yr amcangyfrif am y flwyddyn ariannol bresennol yw y bydd colled arall o oddeutu £100,000, er bod gobaith lliniaru hynny rhywfaint.

Mwy o bobl yn gweithio adref sy'n cael y bai, gan fod tâl parcio yn y ganolfan bron wedi diflannu.

Fe fydd cynllun gweithredu ar gyfer Tŷ Pawb yn cael ei ystyried gan bwyllgor cyflogaeth, busnes a chraffu buddsoddiad Cyngor Wrecsam ddydd Mawrth.