Euro 2020: Cymru'n ysu am fuddugoliaeth yn erbyn Twrci

Bydd Cymru'n herio Twrci yn eu hail gêm yn Euro 2020 ddydd Mercher, gan wybod y byddai buddugoliaeth yn debyg o fod yn ddigon i'w gweld yn mynd trwodd i rownd yr 16 olaf.

Cafodd Cymru gêm gyfartal galonogol 1-1 yn erbyn Y Swistir yn eu gêm gyntaf yn y bencampwriaeth ddydd Sadwrn, a bydd carfan Robert Page yn awyddus i adeiladu ar hynny ddydd Mercher.

Bydd Twrci yn awyddus i gael gwell perfformiad, wedi iddyn nhw gael cweir o 3-0 gan y ffefrynnau i orffen ar frig y grŵp, Yr Eidal.

Bydd y gic gyntaf yn Stadiwm Olympaidd Baku am 17:00 brynhawn Mercher, a bydd modd dilyn y cyfan ar lif byw BBC Cymru Fyw.

'Gêm gartref' i Dwrci

Mae disgwyl hyd at 35,000 o gefnogwyr yn y stadiwm - y mwyafrif llethol o'r rheiny yn gefnogwyr Twrci, a dim ond ychydig gannoedd o Gymry.

Mae rhai hyd yn oed wedi disgrifio'r gêm fel gêm gartref i Dwrci, cymaint fydd y gefnogaeth iddynt yn Baku.

Wedi'r gêm yn Baku fe fydd y garfan yn teithio i Rufain i herio'r Eidal yng ngêm ola'r grŵp ddydd Sul.

Gyda'r gêm anodd honno i ddod, bydd Cymru'n ysu am fuddugoliaeth yn erbyn Twrci.

Mae'n debygol y byddai pedwar pwynt yn ddigon i Gymru fynd trwodd i rownd yr 16 olaf, boed hynny fel ail neu drydydd yn y grŵp.

"Rydyn ni wedi targedu'r gêm yma fel un y gallwn ni wneud yn dda ynddi," meddai Robert Page

Ond mae'r rheolwr wedi gwadu bod hon yn gêm y mae'n rhaid i Gymru ei hennill.

"Mae 'na gêm arall ar ôl - oll allwn ni ei wneud ydy cymryd pob gêm pan ddaw," meddai Page.

"Fe fyddan nhw [Twrci] yn targedu triphwynt o'r gêm yma. Rydyn ni'n barod am hynny.

"Dydy pethau ddim wastad am y perfformiad. Weithiau mewn pencampwriaeth mae angen i chi ffeindio ffordd i ennill. Rydyn ni wedi dangos ein bod yn gallu gwneud hynny a dangos gwytnwch.

"Rydyn ni hefyd wedi targedu'r gêm yma fel un y gallwn ni wneud yn dda ynddi, a bydd hynny'n ei gwneud hi'n gêm dda."

Mae Joe Rodon yn disgwyl perfformiad gwell gan Dwrci ddydd Mercher

Mae amddiffynnwr Cymru, Joe Rodon wedi dweud bod Cymru'n disgwyl ymateb gan Dwrci yn dilyn eu colled nos Wener, yn enwedig o ystyried y gefnogaeth fydd ganddyn nhw yn y stadiwm.

"Yr ymateb naturiol yn dilyn colled ydy dod allan yn brwydro yn y gêm nesaf, ac mae'n rhaid i ni fod yn barod am hynny," meddai.

"Ond mae hi yr un peth i ni, 'dyn ni eisiau ennill hefyd. Mae hi am fod yn gêm anodd ond 'dyn ni'n edrych ymlaen at yr her."