Euro 2020: 'Sawl gwers i'w dysgu cyn wynebu Twrci'

Kieffer Moore yn codi calon y Cymry wedi 73 munud yn erbyn Y Swistir

Mae sawl gwers i'w dysgu o'r gêm gyfartal yn erbyn y Swistir yn ôl cyn-gapten Cymru, Ashley Williams.

"Roeddwn i'n fwy nerfus yn gwylio Cymru ddydd Sadwrn nag oeddwn i yn chwarae yn yr Euros yn 2016!," meddai.

"Yn amddiffynnol roedd Cymru yn gwneud yn hynod o dda, a rydym wedi hen arfer gwneud hynny - caniatáu i dimau ddod atom ni, amddiffyn yn dda, ac yna gollwng Aaron Ramsey neu Gareth Bale yn gyflym a sgorio.

"Ond yn y gêm yn erbyn Y Swistir, er fod yr amddiffyn yn gadarn, unwaith roedden ni wedi cael y bêl roedd y pasio'n wallus, ac roedd y bêl yr oedd Kieffer Moore yn ei chael yn anodd iddo ei thrin a'i dal yn ddigon hir i chwaraewyr eraill ddod yn gymorth iddo.

"Rhaid i Gymru gadw'r bêl yn well a phasio'n gywirach gan chwarae ymhellach i mewn i dir Twrci os am weld llwyddiant nos Fercher."

'Gall y Cymru fod yn hyderus yn mynd mewn i'r gêm,' medd Gwennan Harries

Dywed Gwennan Harries, cyn-ymosodwr Cymru, bod y Cymry yn fuan wedi'r gêm yn siŵr o fod wedi "edrych ar sut oedd Twrci wedi chwarae yn erbyn Yr Eidal a meddwl sut ro'n nhw'n gallu rhoi cryfderau nhw lan yn erbyn gwendidau Twrci.

"Fi'n siŵr y byddan nhw'n hyderus yn mynd mewn i'r gêm yn erbyn Twrci, ond wedi dweud hynna bydd Twrci yn chwarae gêm fwy agored achos bod angen iddyn nhw ddod allan a chael buddugoliaeth."

Wrth roi ei sylwadau ar y gêm dywedodd amddiffynnwr Cymru, Ben Davies, bod wastad bach o banig pan mae'n rhaid dibynnu ar dechnoleg VAR ond ei fod yn dawel hyderus nad oedd ail gôl bosib Y Swistir yn un llwyddiannus.

Cyn-gapten Cymru, Ashley Williams

Roedd Ashley Williams yn bryderus ynghylch ambell beth yn yr amddiffyn yn ogystal.

"Mae angen gwell trefn wrth amddiffyn cic gornel," ychwanegodd.

Fe sgoriodd Y Swistir o gic gornel ac mae'r cyn-gapten yn amheus a oedd y chwaraewyr mwyaf addas yn marcio pob chwaraewr.

"Ar sawl gic gornel roedd chwaraewyr cymharol fychan yn marcio chwaraewyr llawer mwy a chryfach. Roedd Breel Embolo yn rhy gryf i Connor Roberts, ac ar adegau eraill Joe Allen oedd yn ei warchod.

"Fe gafodd Y Swistir naw gic gornel a rhaid i'r trefniadau amddiffyn fod yn well," yn ôl Ashley Williams.

"Elfen arall anodd yn yr amddiffyn oedd pa mor ddwfn yr oedd Allen a Joe Morrell yn chwarae.

"Tra bod Xherdan Shaqiri ar y maes, roeddynt yn chwarae yn agos at y pedwar yn y cefn, er mwyn gwarchod yr amddiffyn, a dim ond ar ôl i Shaqiri adael y maes y gwelwyd y ddau yn mentro'n uwch ar y cae - dyma hefyd pryd y caniatawyd i hyder Embolo dyfu.

"Rhaid peidio gadael i Twrci wneud dim byd tebyg."

Y tîm yn siarad wedi'r gêm ddydd Sadwrn

Nid oes amheuaeth ym meddwl Ashley Williams yng nghylch rhoi lle i Kieffer Moore - ef yw'r enw cyntaf i'w enwi yn y tîm, yn ôl y cyn-amddiffynnwr.

"Dydw i ddim yn credu ei fod yn cael y clod mae e'n ei haeddu, mae'n chwaraewr da iawn, mae'n gyflym, yn glyfar ac yn gallu ergydio gyda'r ddwy droed heb sôn am ei ddawn gyda'i ben fel y gwelson ni yn ei gôl ddydd Sadwrn.

"Gall Cymru chwarae yn llawer iawn gwell na'r hyn a welwyd yn Baku ddydd Sadwrn, ond rhaid cofio am ysbryd y tîm - mynd i lawr o un gôl ond gweithio'n galed i ddod nôl i'r gêm.

"Rydw i'n hyderus y gall y tîm wneud yn well, ac ar ben hynny mae gan Robert Page gymaint mwy o bosibiliadau yn ei sgwad nag oedd gennym yn 2016."

Bydd Cymru yn chwarae yn erbyn Twrci am 17:00 o'r gloch ddydd Mercher ein hamser ni ac yna fe fyddant yn teithio i Rufain i wynebu'r Eidal ddydd Sul, 20 Mehefin.