Llif y Dôn: 'Gig' i adlewyrchu gwefr perfformiadau byw
- Cyhoeddwyd
Melin Melyn, Thallo, Izzy ac Eadyth a Los Blancos yn perfformio eu gigs ar gyfer rhaglen Llif y Dôn
Wrth i ni obeithio bydd y sîn gerddoriaeth fyw yn dychwelyd dros y misoedd nesaf, mae Radio Cymru wedi lansio cyfres newydd o sesiynau a gigs - Llif y Dôn.
Y gobaith ydy adlewyrchu'r wefr o gael bod mewn gig unwaith eto, a chefnogi'r artistiaid talentog sy'n creu cerddoriaeth ar hyn o bryd.
Yn y 'gig' gyntaf, mae Los Blancos, Izzy ac Eady, Melin Melyn a Thallo wedi recordio perfformiadau arbennig yn stiwdios Maida Vale, Llundain a stiwdio Acapella yng Nghaerdydd.
Roedd cyflwynwyr rhaglenni cerddoriaeth nosweithiol Radio Cymru i gyd yn cael dewis artist neu fand yr hoffen nhw eu clywed yn recordio gig.
Dewis Huw Stephens oedd Melin Melyn; fe ofynnodd Sian Eleri am Thallo; dewisiodd Lisa Gwilym Los Blancos ac aeth Rhys Mwyn am Eadyth ac Izzy.
Gwyn Rosser o Los Blancos
Erbyn hyn mae pob un o'r cyflwynwyr wedi chwarae'r sesiynau yn llawn gan eu hartistiaid ar eu rhaglenni.
Ond, nos Iau 15 Mehefin am 18:30 mae rhaglen arbennig efo uchafbwyntiau'r sesiynau i gyd fel petai'n gig efo'r holl fandiau.
Dywedodd Gwyn Rosser o Los Blancos: "Roedd yn eithaf swreal gan nad oedd 'na crowd. Ond fe wnaethon ni baratoi fel ei fod o'n gig byw.
"Roedd hi'n braf gallu ymarfer am y tro cyntaf ers bron i flwyddyn a hanner ac wedyn cael chwarae yn Acapela, roedd o'n brofiad grêt," meddai.
Bydd modd gwylio'r gig yn llawn nos Iau, 15 Gorffennaf 2021 ar dudalen Facebook a Youtube BBC Radio Cymru.