Cyfres 2021: De Affrica 27-9 Llewod

Bydd enillydd y gyfres yn Ne Affrica yn cael ei benderfynu yn y prawf olaf ar ôl i'r Llewod golli o 27-9 i'r Springboks yn yr ail brawf yn Cape Town.

Wedi hanner cyntaf agos, fe wnaeth y tîm cartref reoli'r ail hanner gan sgorio dau gais i sicrhau'r fuddugoliaeth.

Er bod perfformiad De Affrica gryn dipyn yn well na'r hyn a welwyd yn y prawf cyntaf, bydd Warren Gatland a'r Llewod yn siomedig gyda sawl agwedd o'r gêm, yn bennaf eu disgyblaeth yn y chwarter olaf.

• De Affrica 17-22 Llewod

Yr ymwelwyr oedd ar y blaen o 9-6 ar hanner amser wedi tair cic gosb i Dan Biggar a dwy i faswr y Sprinboks, Handrè Pollard.

Ond mewn gêm hynod gorfforol ac ar ôl llawer o sôn am y dyfarnwyr wedi'r prawf cyntaf, roedd disgyblaeth y ddau dîm o dan y chwyddwydr.

Alun Wyn Jones a Eben Etzebeth yn gwrthdaro yn ystod hanner cyntaf tanllyd

Wedi 23 munud cafodd asgellwr y Llewod, Duhan Van Der Merwe gerdyn melyn am faglu Cheslin Kolbe.

Munud yn ddiweddarach cafodd Kolbe ei hun ei yrru o'r maes am 10 munud wedi iddo ymyrryd â Conor Murray tra roedd o yn yr awyr yn derbyn cic uchel, gan achosi i'r Gwyddel lanio'n beryglus.

Daeth y cais cyntaf ym mhum munud cynta'r ail hanner gyda'r asgellwr Makazole Mapimpi yn dal cic grefftus Pollard, cyn croesi'r gwyngalch gan ddangos ei gyflymder a'i nerth.

Sgoriodd yr asgellwr Makazole Mapimpi ei 15fed cais mewn 16 gêm rhyngwladol

Wedi awr o chwarae fe sgoriodd De Affrica eu hail gais.

Wedi sgarmes symudol nerthol gan y tîm cartref fe giciodd y mewnwr Faf de Klerk tu ôl i'r amddiffyn ac fe diriodd y canolwr Lukhanyo Am.

Yn ugain munud ola'r gêm daeth mwy a mwy o gamgymeriadau gan y Llewod wrth iddyn nhw ildio sawl cic gosb a rhoi'r cyfle i Handrè Pollard anelu at y pyst deirgwaith i gynyddu mantais De Affrica.

Gorffennodd y tîm cartref yn gryf gyda'r eilyddion yn cael effaith ar y chwarae.

Mae'r gyfres bellach yn gyfartal, un buddugoliaeth yr un, a bydd yr enillydd yn cael ei benderfynu yn y prawf olaf yn Cape Town y penwythnos nesaf.

Wedi'r gêm fe ddywedodd capten y Llewod, Alun Wyn Jones "Bydd Gats[land] yn gwneud newidiadau ar gyfer y gêm yr wythnos nesaf - bydd e ddim yn ofn gwneud hynny."

Maswr De Affrica, Handrè Pollard, a lwyddodd gyda phum cic rydd a throsiad yn y gêm