Bachgen tair oed wedi marw mewn gwrthdrawiad ar fferm

Mynedfa'r fferm ble bu farw'r bachgen

Mae plentyn tair oed wedi marw mewn digwyddiad ar fferm ger Efailwen yn Sir Gaearfyrddin.

Cafodd y gwasanaethau brys eu galw i'r fferm nos Fawrth, 3 Awst wedi adroddiad o wrthdrawiad rhwng y plentyn a cherbyd yno.

Bu farw'r bachgen yn y fan a'r lle.

Mewn datganiad, dywedodd Heddlu Dyfed-Powys: "Cafodd yr heddlu eu galw i wrthdrawiad rhwng cerbyd a phlentyn ar eiddo preifat am oddeutu 19:00 nos Fawrth.

"Yn drist iawn bu farw bachgen bach tair oed.

"Mae ymchwiliad i amgylchiadau'r digwyddiad wedi dechrau ac mae'r teulu yn cael eu cefnogi gan swyddogion arbenigol.

"Cafodd y Gweithgor Iechyd a Diogelwch a'r crwner eu hysbysu. Ni chafodd unrhyw un arall ei anafu."

'Loes a phoen anfesuradwy'

Cadarnhaodd Gwasanaeth Ambiwlans Cymru eu bod nhw wedi gyrru ambiwlans a dau gerbyd ymateb brys i ddigwyddiad yn ardal Efailwen, Sir Gaerfyrddin am 18:58 nos Fawrth.

Dywed Carwyn James 'bod loes a phoen y teulu yn anfesuradwy'

Mae Carwyn James yn berchennog busnes yn yr ardal ac wrth ymateb dywedodd: "Mae lot ohonom ni yn dod o gefndir amaethyddol, cefndir gwledig iawn sydd â chymdeithasau agos a ni gyd yn cefnogi'n gilydd mewn amser caled ond all neb ddychmygu y loes a'r poen mae'r teulu yma yn ei wynebu.

"Mae'n ddigwyddiad hollol erchyll. Mae'n anfesuradwy faint o loes a phoen mae'r teulu yma yn ei wynebu ar hyn o bryd."

Bydd yr ardal yn cefnogi teulu'r bachgen, medd y Parchedig Huw George

Dywedodd y Parchedig Huw George sy'n weinidog ac yn gynghorydd gerllaw: "Ni fel ardal yn gwingo o dan gwmwl. Mae geiriau yn diflannu... beth sydd 'dan ni yw teulu ac unigolion sy'n dioddef ond mae nhw'n gwybod bod yr ardal hon a theuluoedd y fro yma ar eu cyfer."