'Ymosodiad difrifol' ar ddyn ifanc yn Wrecsam

Mae dyn ifanc wedi cael anafiadau difrifol wedi ymosodiad arno ger archfarchnad yn Wrecsam.

Fe ddigwyddodd yr ymosodiad ger archfarchnad Morrisons ychydig cyn 12:00 ddydd Sul, yn ôl Heddlu Gogledd Cymru.

Cafodd dyn 18 oed ei gludo i'r ysbyty, ac yn ôl tystion, roedd yna nifer fawr o swyddogion heddlu yn yr ardal, gan gynnwys swyddogion arfog, ynghyd â chŵn heddlu a hofrennydd.

Cadarnhaodd yr heddlu yn hwyr nos Sul eu bod wedi arestio dau ddyn mewn cysylltiad â'r digwyddiad a'u bod yn cael eu holi yn y ddalfa.

Cerbyd heddlu ger archfarchnad Morrisons yn Wrecsam brynhawn Sul

Roedd y llu wedi nodi'n gynharach bod bwriad cael presenoldeb heddlu mwy amlwg yn y ardal weddill ddydd Sul wrth i'r ymholiadau barhau i'r achos.

"Nid ydym yn chwilio am unrhyw un arall mewn cysylltiad â'r digwyddiad yma a hoffwn roi sicrwydd i'r cyhoedd nad oes unrhyw bryderon cyfredol ar ran y gymuned," ychwanegodd eu datganiad.

"Gan fod hwn yn ymchwiliad sy'n parhau, gofynnwn i'r cyhoedd ymatal rhag damcaniaethau ynghylch y digwyddiad yma ar y cyfryngau cymdeithasol."

Mae gofyn i bobl ddyfynnu'r cyfeirnod z119739 os oes gyda nhw wybodaeth all fod o gymorth i'r ymchwiliad.