Ymdrech i achub dyn sy'n 'ofni am ei fywyd' yn Afghanistan

Mae menyw o Fro Morgannwg yn ymdrechu i helpu ei ffrind ddianc o Afghanistan wrth iddo "ofni am ei fywyd".

Dywedodd Anna Prince, sy'n byw yn Y Barri, bod ei ffrind Ahmad - nid ei enw iawn - wedi'i frawychu pan gymerodd y Taliban y pŵer gan lywodraeth y wlad unwaith eto.

Yn siarad â BBC Cymru, dywedodd Ahmad ei fod yn darged i'r Taliban oherwydd ei waith fel athro i fenywod a phlant, yn ogystal â'i amser fel cyfieithydd i luoedd Prydain a'r Unol Daleithiau.

"Cyn iddyn nhw [y Taliban] ddod mewn i Kabul, ges i fygythiadau oddi wrthyn nhw," meddai.

"Dywedon nhw eu bod yn chwilio am bobl sy'n dysgu menywod neu wedi gweithio fel cyfieithwyr, ac yn mynd i dorri eu pennau bant."

"'Naethon nhw ladd rhai o fy ffrindiau gorau yn fy mhentref," ychwanegodd.

Mae'r Taliban nawr wedi llwyddo i gipio pŵer yn llwyr yn Afghanistan

Pan ddaeth y Taliban i rym yn Afghanistan yn wreiddiol yn yr 1990au, fe wnaeth Ahmad ffoi o'r wlad.

Dychwelodd ar ôl blynyddoedd maith, ond mae o nawr yn ceisio dianc eto.

"Mae pawb eisiau gadael Afghanistan," meddai.

"Ond doedd hyd yn oed y rhai gyda visas, greencards neu basbortau Prydeinig methu mynd trwy'r torfeydd i gyrraedd y maes awyr.

"Mae pawb yn gwybod os ni fydda' nhw gadael, bydden nhw'n cael eu lladd, maen nhw am ladd ni fel anifeiliaid."

• Afghanistan: 'Angen gweithredu nawr' ar ailgartrefu

• Darlunydd yn disgrifio trasiedi rhyfel Afghanistan

Mae Ahmad wedi dweud ei fod eisoes wedi gweld y Taliban yn saethu menywod, ac wedi clywed straeon am fenywod a phlant yn cael eu lladd.

Dywedodd nad oedd llywodraeth Afghanistan yn barod i luoedd y DU a'r UDA adael.

"Mae gen i ofn trwy'r amser bydda nhw'n ffeindio fi, a fy lladd," dywedodd.

Mae Anna Prince wedi dweud y bydd yn gwneud popeth yn ei phŵer i achub Ahmad

Daeth Anna ac Ahmad yn ffrindiau dros gyfryngau cymdeithasol, gan rannu diddordebau mewn celf a llenyddiaeth.

Mae Anna nawr wedi cysylltu gyda gwleidyddion yn lleol i geisio sicrhau ffordd allan o Afghanistan i Ahmad.

"Byddai'n rhoi popeth er mwyn helpu hyd yn oed un person yno, dwi'n mynd i 'neud beth bynnag allai," meddai.

"Dydy hi ddim yn deg, i ni adael nhw yno.

"Roedd gan Ahmad fywyd da ac roedd o eisiau gwneud bywyd da i'w hun, ond nawr mae popeth yn cael ei dynnu i ffwrdd."