Gweithgaredd poblogaidd Parkrun yn ailddechrau

Fe wnaeth bron i 500 o bobl gymryd rhan yn Parkrun Caeau Pontcanna, Caerdydd ddydd Sadwrn

Mae gweithgaredd poblogaidd Parkrun wedi ailddechrau yng Nghymru ddydd Sadwrn.

Nid yw'r gweithgaredd wedi gallu digwydd yma ers y cyfnod clo cyntaf ym Mawrth 2020.

Ond wrth i'r Prif Weinidog, Mark Drakeford gyhoeddi bod Cymru'n symud i lefel rhybudd sero ddechrau'r mis, fe gadarnhaodd trefnwyr y bydd rasys yn digwydd eto.

Er hynny, nid yw'n bosib eto i bob un o'r canolfannau ailddechrau rasys am nifer o resymau gwahanol.

Yn y gweithgaredd mae pobl yn mynd i ardaloedd penodol i redeg rasys 5km, ond gall pobl hefyd gerdded, ar foreau Sadwrn am 09:00.

Cyn y pandemig, roedd tua 200,000 o bobl wedi cofrestru gyda Parkrun mewn dros 50 o safleoedd ar draws Cymru.

Credir bod hyd at 80% o safleoedd Parkrun yng Nghymru wedi ailddechrau ddydd Sadwrn, gyda'r Parkrun i ieuenctid rhwng 11-14 oed yn ailddechrau fore Sul.

Mae'r gweithgaredd yn cael ei redeg gan wirfoddolwyr ar draws y DU, ac mae'n dibynnu hefyd ar ewyllys da rhai tirfeddianwyr i'w gynnal.

Roedd Peter Bradley'n synnu bod cyn gymaint wedi mentro i gaeau Pontcannau ddydd Sadwrn er y glaw

Dywedodd Peter Bradley, un o'r gwirfoddolwyr ar gaeau Pontcanna yng Nghaerdydd: bod "bron i 500 o bobol wedi troi allan heddiw" er gwaethaf tywydd anffafriol yma.

"Dwi'n siŵr bod nhw'n mynd i ffeindio bod yna fanteision jest cael symud - yn enwedig os ti'n mynd yn hen fel fi!"

Ymhlith y rasys a gafodd eu cynnal roedd Parkrun Parc Bute yng Nghaerdydd a Pharc Ynysangharad ym Mhontypridd.

Bu ennyd o dawelwch cyn dechrau'r Parkrun yn Nhrelai i gofio pobl fu farw yn ystod y pandemig.

Pobl yn paratoi i redeg a cherdded cwrs Parkrun Trelai, yng Nghaerdydd fore Sadwrn