Arestio dyn ar amheuaeth o lofruddiaeth yn Y Barri

Cafodd yr heddlu eu galw i'r eiddo yma ar stryd West Walk yn yr oriau mân

Mae dyn 53 oed wedi cael ei arestio ar amheuaeth o lofruddiaeth yn sgil "marwolaeth annisgwyl" dyn mewn eiddo ym Mro Morgannwg.

Cafodd swyddogion eu galw i'r eiddo ar stryd West Walk yn ardal Colcot, Y Barri tua 01:00 fore Gwener.

"Mae'r digwyddiad yma'n cael ei drin fel llofruddiaeth," medd datganiad y llu.

Nid yw'r dyn fu farw wedi'i adnabod yn ffurfiol eto.

"Mae hwn yn apêl uniongyrchol i'r gymuned leol a allai gynnig gwybodaeth mewn perthynas ag unrhyw weithgaredd amheus yn ardal West Walk yn y Barri a'r cyffiniau, yn enwedig rhwng nos Lun a bore Gwener, 3 Medi," meddai Ditectif Uwch-arolygydd Darren George.

"Ni waeth pa mor ddibwys y credwch y gallai unrhyw wybodaeth fod, cysylltwch â'r ystafell ddigwyddiadau fawr."

Mae swyddogion yn dal yn cynnal ymholiadau yn yr eiddo, ac mae ystafell neilltuol wedi ei sefydlu o fewn Gorsaf Heddlu Canol Caerdydd ar gyfer yr ymchwiliad.

Mae gofyn i unrhyw un all gynnig gwybodaeth gysylltu gyda'r Tîm Troseddau Mawr gan ddyfynnu'n cyfeirnod 2100309626.