Tro pedol Cyngor Môn ar amddiffynfeydd môr Penmon

Fe fydd Cyngor Ynys Môn yn sefydlogi amddiffynfeydd môr ar hyd y Fenai er i gynlluniau gwreiddiol gael eu gwrthod oherwydd honiadau o "fandaliaeth amgylcheddol".

Cafodd y cynllun i ailosod wal 90m sy'n amddiffyn adeilad Cerrig ger Penmon ei wrthod gan y pwyllgor cynllunio ym mis Medi oherwydd pryderon dros ei effaith ar Draeth Lleiniog.

Mae'r traeth wedi'i ddisgrifio fel safle o "ddiddordeb pwysig" i wyddonwyr a daearegwyr ledled y byd.

Cafodd y cynllun ei wrthod gan gynghorwyr lleol oherwydd yr effaith y gallai peirianwaith trwm ei gael ar y traeth sydd llawn henebion o Oes yr Iâ.

Mae Cyngor Môn eisoes wedi cael eu beirniadu gan bobl leol dros niwed i'r traeth ar ôl i glogfeini cael eu symud yn ystod gwaith atal llifogydd yn 2018.

Ond yn dilyn addewid y gall unrhyw ddifrod cael ei liniaru, fe wnaeth y pwyllgor cynllunio newid eu penderfyniad gwreiddiol gan alluogi'r gwaith i fynd ymlaen.

Mewn adroddiad newydd, fe wnaeth yr ymgeisydd dangos fe fydd mesurau i reoli unrhyw niwed i fywyd gwyllt a'r ecoleg - megis cynllun llygredd - yn cael eu gweithredu.

Mae Cynghorwyr Gary Pritchard, Carwyn Jones ac Alun Roberts yn gwrthwynebu'r cynllun.

Yn ôl perchennog Cerrig mae'r gwaith yn angenrheidiol oherwydd cyflwr "gwael" yr amddiffynfeydd presennol.

Serch hyn mae'r tri chynghorydd sy'n cynrychioli'r ardal leol wedi beirniadu penderfyniad y cyngor i alluogi'r gwaith i fynd ymlaen.

Dywedodd Carwyn Jones, cynghorydd Plaid Cymru dros ardal Seiriol, fe fydd y gwaith yn newid yr ardal leol yn sylweddol.

"Mae caniatau hyn yn gwawdio'r Ardal o Ddiddordeb Gwyddonol Neilltuol ac unrhyw ddynodiadau eraill sydd wedi'u gwobrwyo... mae'n gwneud nhw'n ddiwerth," meddai.