Dyn yn cyfaddef un cyhuddiad yn achos Emiliano Sala

Mae David Henderson (chwith) wedi cyfaddef un cyhuddiad, ond mae'n gwadu'r ail gyhuddiad yn ei erbyn

Mae dyn wedi cyfaddef un cyhuddiad wrth i'r achos llys yn ymwneud â marwolaeth y pêl-droediwr Emiliano Sala ddechrau ddydd Llun.

Mae David Henderson, 66, wedi pledio'n euog i gyhuddiad o geisio trefnu taith heb ganiatâd priodol, mewn cysylltiad â'r awyren roedd Sala yn teithio arni pan fu farw.

Fe wnaeth Mr Henderson, o Hotham, Sir Dwyrain Efrog, newid ei ble yn ystod y gwrandawiad yn Llys y Goron Caerdydd.

Mae Mr Henderson hefyd wedi pledio'n ddieuog i gyhuddiad o beryglu diogelwch awyren.

Yr Awdurdod Hedfan Sifil sydd wedi dwyn yr achos yn ei erbyn.

Bu farw Emiliano Sala a'r peilot David Ibbotson yn y digwyddiad ar 29 Ionawr 2019

Mae Mr Henderson wedi ei gyhuddo o drefnu'r daith awyren roedd Sala a'r peilot Dave Ibbotson arni pan blymiodd i Fôr Udd yn Ionawr 2019.

Roedd yr awyren Piper Malibu yn cludo'r chwaraewr 28 oed, oedd wedi arwyddo cytundeb gwerth £15m i ymuno â'r Adar Gleision, o Nantes yn Ffrainc i Gaerdydd.

Cafodd corff Sala ei ddarganfod ar wely'r môr y mis canlynol, ond dydy corff Mr Ibbotson, o Crowle, Sir Lincoln, na gweddillion yr awyren wedi eu codi o'r môr.

Mae disgwyl i'r achos bara am 10 diwrnod.