Dyn wedi marw mewn gwrthdrawiad ar yr A470 yn Llandudno
- Cyhoeddwyd
Fe ddigwyddodd y gwrthdrawiad ger gwesty Bodysgallen Hall brynhawn Mawrth
Mae dyn wedi marw yn dilyn gwrthdrawiad ar yr A470 ar gyrion Llandudno brynhawn Mawrth.
Dywedodd Heddlu Gogledd Cymru eu bod wedi cael eu galw i'r gwrthdrawiad rhwng dau Volkswagen - un du ac un gwyn - ger gwesty Bodysgallen Hall toc wedi 15:45.
Bu farw gyrrwr y car gwyn - dyn lleol y credir oedd yn ei 70au - yn y fan a'r lle.
Mae'r dyn oedd yn gyrru'r car arall wedi cael ei gludo i'r ysbyty gyda mân anafiadau.
Mae'r llu yn apelio ar unrhyw dystion i'r gwrthdrawiad i gysylltu â nhw.