Port Talbot: Dyn wedi marw ar ôl i ddau gar daro ei gilydd

Fe ddigwyddodd y gwrthdrawiad am tua 19:30 nos Sadwrn

Mae dyn 22 oed wedi marw ac mae dyn arall yn yr ysbyty gydag anafiadau difrifol yn dilyn gwrthdrawiad ym Mhort Talbot nos Sadwrn.

Cafodd tri pherson eu cymryd i'r ysbyty yn dilyn y digwyddiad rhwng dau gar ar y B4287 yn Efail-fach, Pontrhydyfen.

Yn ôl Heddlu De Cymru, roedd un car Mazda MX5 gwyrdd yn cario'r dyn 22 oed fu farw, yn ogystal â'r gyrrwr 27 oed sydd yn yr ysbyty gydag anafiadau all beryglu ei fywyd.

Roedd tri pherson yn y car arall - Ford Fiesta coch - ac aeth y gyrrwr hefyd i'r ysbyty gydag anafiadau. Ni anafwyd y ddau arall.

Roedd y ffordd ar gau am nifer o oriau wrth i'r heddlu ymchwilio i'r digwyddiad.

Mae'r heddlu'n apelio am wybodaeth.