Gwrthdrawiad A5 Llangefni: Cyhoeddi enw dyn, 28, fu farw

Roedd Joseph Hollingsworth yn 28 oed ac yn dod o ardal Caergybi

Mae dyn fu farw yn dilyn gwrthdrawiad ar Ynys Môn nos Iau wedi cael ei enwi gan yr heddlu.

Roedd Joseph Hollingsworth yn 28 oed ac yn dod o ardal Caergybi.

Dywedodd teulu Mr Hollingsworth fod ganddo "galon aur" ac y byddai colled ar ei ôl.

Cafodd y gwasanaethau brys eu galw i wrthdrawiad un cerbyd ar gyrion Llangefni am tua 17:30 ar 2 Rhagfyr.

Fe wnaeth y car daro wal a pharhau i gae cyfagos ar yr A5 Ffordd Caergybi rhwng Rhostrehwfa a Nant Turnpike.

Bu farw Mr Hollingsworth, oedd yn gyrru'r car, yn y fan a'r lle.

Mae dyn 25 oed oedd hefyd yn y car yn parhau yn yr ysbyty gydag anafiadau difrifol.

Mae Heddlu Gogledd Cymru yn parhau i ymchwilio i'r digwyddiad ac yn apelio am wybodaeth gan unrhyw dystion.