Dyn yn y llys ar gyhuddiad o lofruddiaeth parc carafanau

Cafodd Heddlu Gwent eu galw i barc carafanau The Beeches ddydd Llun

Mae dyn o Sir Fynwy wedi ymddangos yn y llys ar gyhuddiad o lofruddiaeth wedi marwolaeth dyn mewn carafan ym Magwyr.

Mae Darren Smith, 42, wedi ei gyhuddo o lofruddio Richard Thomas, 52, ym mharc carafanau The Beeches, Knollbury, yn oriau mân fore Llun, 20 Rhagfyr.

Fe glywodd Llys Ynadon Casnewydd fore Gwener y cafodd Mr Thomas "losgiadau sylweddol i'w gorff" a bu farw'n ddiweddarach "o'i anafiadau".

Siaradodd Mr Smith i gadarnhau ei enw a'i gyfeiriad yn unig.

Dywedodd mai ei gyfeiriad oedd "rhif dau, parc carafanau The Beeches".

Dywedodd Heddlu Gwent y cawson nhw eu galw i'r parc carafanau am 02:30 fore Llun wedi adroddiadau o dân yno.

Cafodd Mr Smith ei gadw yn y ddalfa a chafodd yr achos ei anfon at Lys y Goron, Caerdydd, ble fydd yn ymddangos yr wythnos nesaf.

Nid yw'r heddlu'n chwilio am unrhyw un arall mewn cysylltiad â'r digwyddiad.

Mae teulu Mr Thomas yn parhau i dderbyn cefnogaeth swyddogion arbenigol, meddai Heddlu Gwent.