'Roedd hi'n werth cyflwyno cyfyngiadau yn sgil Omicron'

Mae arweinydd y Ceidwadwyr yn y Senedd yn credu bod Llywodraeth Cymru wedi gorymateb i Omicron

"Roedd hi'n werth cyflwyno cyfyngiadau yng Nghymru yn sgil amrywiolyn Omicron," medd y Gweinidog Economi, Vaughan Gething.

Heblaw am gyfyngiadau Llywodraeth Cymru byddai mwy o bobl wedi dioddef, meddai.

Dywed y Ceidwadwyr Cymreig bod y llywodraeth wedi "gorymateb yn sgil Omicron".

Ddydd Sadwrn fe wnaeth y rheolau yng Nghymru lacio wrth i'r cyfyngiad ar faint o bobl sy'n cael ymasglu y tu allan gynyddu o 50 i 500.

Mae clybiau chwaraeon ac elusen redeg parkrun wedi croesawu'r newid.

'Mae'r camau positif ry'n wedi eu cymryd fis diwethaf wedi bod yn werthfawr,' medd Vaughan Gething

Wrth gael ei holi ar raglen Politics Wales y BBC a oedd gosod cyfyngiad o 50 person yn rhy eithafol, dywedodd y Gweinidog Economi: "Fe gawson drafodaeth am gyfyngu gweithgareddau y tu allan a chyngor ein prif swyddog meddygol a'r ymgynghorydd gwyddonol oedd bod hynny yn beth iawn i'w wneud."

Mae rhai wedi gofyn a oedd y cyfyngiadau a gyflwynwyd ar Ddydd San Steffan yn angenrheidiol o ystyried y niwed economaidd i fusnesau lletygarwch.

Mae Mr Gething yn mynnu bod y cyfyngiadau yn angenrheidiol ac yn dweud bod achosion wedi codi fwy yn Lloegr yn sgil llai o fesurau amddiffynnol.

"Dyw hwn ddim fel annwyd cyffredin," meddai Mr Gething, "mae Omicron yn fwy trosglwyddadwy. Dyw e ddim cynddrwg ag amrywiolion eraill ond eto mae'n gallu taro rhywun yn wael.  

"Gallwn fod yn hyderus y byddai mwy o bobl wedi dioddef heb y cyfyngiadau a dwi o'r farn bod y camau a gymerwyd fis diwethaf wedi bod yn werthfawr."

Beth sy'n newid?

Mae'r cyfyngiadau'n newid mewn pedwar cam, meddai'r prif weinidog ddydd Gwener, gyda'r nifer a all fynd i ddigwyddiad awyr agored wedi codi o 50 i 500 ddydd Sadwrn, 15 Ionawr.

Wrth ateb cwestiwn am be fyddai'n atal y llacio, dywedodd Mr Gething ei bod yn bwysig edrych ar nifer yr achosion yn ystod y dyddiau nesaf a'i bod yn debygol mai llacio'n raddol yw'r ateb gorau - sef yr hyn y mae Llywodraeth Cymru wedi bod yn ei weithredu.

"Ond rhaid i ni barhau i edrych a oes amrywiolyn arall neu cynnydd yn nifer yr achosion ac os oes yna mae'n rhaid i ni ystyried a fyddai cyflwyno mesurau yn gwneud gwahaniaeth."

Ymateb y gwrthbleidiau

Ddydd Gwener dywedodd arweinydd y Ceidwadwyr Cymreig yn y Senedd, Andrew RT Davies: "Rwy'n falch eu bod o'r diwedd wedi gwrando ar alwadau gan y Ceidwadwyr Cymreig.

"Er gwaetha'r dystiolaeth wyddonol fanwl o Dde Affrica, mae gweinidogion Llafur yn amlwg wedi gorymateb i Omicron, ac mae hynny wedi achosi poen a gofid sylweddol i deuluoedd a busnesau yng Nghymru."

Dywedodd llefarydd Plaid Cymru ar iechyd, Rhun ap Iorwerth: "Os ydyn ni, fel mae'n ymddangos ar frig y don, y peth iawn i'w wneud yw gweld sut y gallwn ni ymateb yn ddiogel.

"Mae codi'r cyfyngiad ar y nifer a all fynd i ddigwyddiadau awyr agored yn fan da i ddechrau ac yna symud os yw pethau'n parhau i wella yn ystod y diwrnodau nesaf i godi'r cyfyngiadau ar y diwydiant lletygarwch."